नाशिक / देवगाव : कोरोनाच्या संकटात शेतकऱ्यांनी आर्थिक टंचाईचा सामना करत उसनवारी करून बळीराजा खरीपात पेरणीकरीता तयारीला लागला. मात्र येथे देखील संकटे त्याची पाठ सोडतांना दिसत नसल्याने दिसून आले आहे. त्याला कारणही तसेच आहे. खरेदी केलेल्या सोयाबीन बियाण्याची योग्य उगवण न झाल्यामुळे देवगाव परिसरातील शेतकरी मोठ्या आर्थिक अडचणीत सापडला आहे.

शेतकरी मोठ्या आर्थिक अडचणीत

खरीप हंगामात शेतकऱ्यांनी सोयाबीनची मोठ्या प्रमाणात पेरणी केली. पण खरेदी केलेल्या सोयाबीन बियाण्याची योग्य उगवण न झाल्यामुळे देवगाव परिसरातील शेतकरी मोठ्या आर्थिक अडचणीत सापडला असून त्याच्यावर दुबार पेरणीचे संकटही उभे ठाकले आहे. गेल्या हंगामात सोयाबीनच्या पोषण अवस्थेत व काढणीच्या काळातच अवकाळी पाऊस झाला. त्यामुळे बीजोत्पादन सोयाबीन क्षेत्रातील बीजाला फटका बसला. बाजारातही सोयाबीनचा तुटवडा निर्माण झाल्यामुळे राज्य शासनाच्या कृषी विभागाने सोयाबीनच्या घरच्याच बियाण्याची उगवण क्षमता तपासून वापरण्याचे आवाहन केले होते. अशी परिस्थिती असताना दुकानांत सोयाबीनच्या बियाण्यांची खरेदीकरिता शेतकऱ्यांकडून मागणी होऊन गर्दी वाढली. परंतु आता पेरलेले सोयाबीनचे बियाणे बोगस निघाल्याच्या तक्रारी स्थानिक शेतकऱ्यांकडून येवू लागल्या आहेत.

दुबार पेरणी करावी लागणार

कमी उगवणक्षमतेमुळे आता येथील शेतकऱ्यांना दुबार पेरणी करावी लागणार आहे. त्यामुळे आर्थिक फटका बसलेल्या नुकसानग्रस्त शेतकऱ्यांच्या क्षेत्राचे पंचनामे करावेत व बियाणे कंपनीवर तत्काळ कारवाई करून शेतकऱ्यांना मदत करावी, अशी मागणी येथील शेतकरी विनायक बोचरे, मनोहर बोचरे, राजेंद्र मेमाणे, जावेद शेख, विलास बोचरे, बाळासाहेब बोचरे, योगेश बोचरे, अक्षय बोचरे, विजय बोचरे आदींसह परिसरातील शेतकऱ्यांनी केली आहे.

घरचे बियाणे उगवले

काही शेतकऱ्यांनी एकाच दिवशी घरचे आणि कंपनीचे बियाणे पेरले; परंतु ज्या शेतकऱ्यांनी घरचे सोयाबीन बियाणे पेरले त्या शेतकऱ्यांचे सोयाबीन उगवले असल्याचे निदर्शनास आल्याची माहिती या वेळी काही शेतकऱ्यांनी दिली.

हेही वाचा > धक्कादायक! लहान भावाने मोठ्या भावाच्या डोक्यात घातला दगड..जागीच ठार...कारण वाचून व्हाल थक्क..

ज्या शेतकऱ्यांची पेरणी करून सोयाबीन बियाणे उगवले नाही. अशा शेतकऱ्यांनी उपविभागीय कृषी अधिकाऱ्यांकडे बियाण्याच्या दुकानाच्या बिलासह लेखी तक्रार अर्ज करावा. तक्रारीनंतर संबंधित क्षेत्राची पाहणी करण्यात येईल. - डी. एन. सोमवंशी, मंडल अधिकारी

हेही वाचा > अंत्यविधीची सुरू होती तयारी...अन् 'ती' एक बातमी येताच सगळ्यांनाच फुटला घाम..