खामखेडा (जि. नाशिक) : एप्रिल महिन्याच्या सुरवातीला कांदा काढणी सुरु होते. कांदा काढणी झाल्यांनतर लगेचच शेतकरी उन्हाळ कांद्याची साठवणूक करतात. या वर्षी जानेवारीत कांदा लागवड सुरु झाल्याने सध्या शेतकरी वर्ग कांदाचाळ दुरुस्ती व डागडुजीच्या कामात गुंतला आहे. अनेक ठिकाणी कांदा साठवणुकीसाठी इतर साधनांची तजवीज करण्यात कांदा उत्पादक गुंतला आहे.

उन्हाळ कांदा साठवणुकीसाठी शेतकरी विविध प्रयोग करतो. त्यामुळे सध्या उन्हाळ कांदा काढणीपूर्वी कांदा साठवणूक करण्याची जागा, कांदाचाळ दुरुस्ती तसेच डागडुजी करण्याच्या कामात शेतकरी वर्ग गुंतला आहे. अनेक शेतकऱ्यांनी कांदाचाळ तयार करताना तारेच्या जाळीचा वापर केला असून, वेळू काठी, टोकर, कायरी या वनस्पतींचा वापर केला जात आहे. यामुळे कांद्याला हवा खेळती मिळते व कांदा चांगला टिकतो. कांदा साठवण्याच्या जागी अनेक शेतकरी सिमेंट कॉंक्रीट करून घेतात. तर काही शेतकरी या जागेवर वाळू टाकतात. कांदा सडल्यास त्यातून निघणारे खराब पाणी हे त्या जागेत मुरते व दुर्गंधी पसरत नाही. दरवर्षी शेतकरी कांदा काढणीपूर्वी हे काम करतात.

अनेक शेतकरी पक्क्या कांदा चाळीऐवजी उसापासून निघणाऱ्या पाचटापासून कांदा चाळ तयार करतात. यामुळे तापमान नियंत्रणात राहून कांदा अधिक काळ टिकतो. त्यामुळे या पाचटाच्या चाळीवर कांदा साठवणुकीपूर्वी शेतकरी प्लॅस्टिक आवरण टाकून सध्या अशी कामे करण्यात गुंतले आहेत.