नांदगाव (जि.नाशिक) : तालुक्यात पावसाने ओढ दिल्याने शेतकरी हवालदिल झाला आहे. अद्याप पाऊस नसल्याने पेरण्या खोळंबल्या आहेत. सातत्याने अर्वषणाचा शाप भाळी लाभलेल्या तालुक्यात दोन वर्षांत परतीच्या पावसाने अतोनात नुकसान झाले. दीड वर्षांपासून कोविडच्या छायेत असलेल्या तालुक्यात पुन्हा एकदा दुष्काळसदृश स्थिती उद्भवते की काय, या साशंकतेने भर टाकली आहे.(Farmers-worried-Drought-with-covid-nashik-marathi-news)

पुन्हा एकदा दुष्काळसदृश स्थिती उद्भवते की काय?

नांदगाव तालुक्यात मका, कपाशी, बाजरी, भुईमूग, तेलबिया, कडधान्य आदी पिकांना प्राधान्य दिले जाते. जूनचे २१ दिवस संपले तरी २०२१ मधील खरीप हंगामात पावसाचा अजून थेंब नाही. राज्यात इतरत्र पाऊस कोसळत आहे. पण, नांदगाव तालुका यास अपवाद आहे. दुष्काळग्रस्त तालुका म्हणून ओळख असलेल्या नांदगाव तालुक्यात पाऊस झाला की नाही झाला तरी पिकांची नासाडी होत असते. २००९ मध्ये तालुक्यात महापूर आला होता. त्यानंतर दोन वर्षे बरी गेली. त्यानंतर पुन्हा पाऊस नसल्याने दुष्काळाला सामोरे जावे लागले. २०१९-२० मध्ये तर परतीच्या पावसाने पिकांची नासाडी झाली. २०२१ च्या खरीप हंगामात जूनमध्ये वादळाने थैमान घालत उन्हाळी भाजीपाला, फळांची पडझड झाली. त्यात आंबा, केळी, पेरू, लिंबू, जांभूळ आदी फळांना सपाटून मार बसला. फळे जमिनीवर पडून मातीमोल झाली.

पेरण्या खोळंबल्या

जूनमधील मृग नक्षत्र गेले तरी शेतकऱ्यांनी पेरणीची पांभर पुजली नाही. आकाशाकडे डोळे लावून बसण्याची वेळ आली आहे. महागडी खते, बियाणे खरेदी करण्याचे काम सध्या सुरू आहे. पाऊस पडेल, अशी आशा शेतकरी बाळगून आहेत. बोलठाण, जातेगावच्या घाटमाथ्यावर पेरणीयोग्य पाऊस झाल्याने सहा गावांमध्ये पेरणी झाल्याचे चित्र आहे. तर तालुक्यात इतरत्र पाऊस नसल्याने पेरण्या खोळंबल्या आहेत.