नाशिक : सोशल मीडियावर (Social media) पैसे मागण्याचे प्रकार वाढले आहे. अशाच एका प्रकरणात फेसबुकवरील तरुणीची फ्रेंड रिक्वेस्ट स्वीकारणे एकाला चांगलेच महागात पडले. फ्रेंड रिक्वेस्ट स्विकारल्यानंतर तरुणाला ब्लॅकमेल करून पैशाची मागणी सुरू झाल्याने तरुणाने थेट पोलिस स्टेशन गाठत आपबिती सांगितली. या प्रकरणी सायबर पोलिसांत गुन्हा दाखल करण्यात आला आहे.

तरुणीने व्हिडीओ कॉल केला अन्....

सोशल मीडियावर अनेक फसवणुकीच्या घटना समोर आल्या आहेत. फेसबुक (Facebook), इंस्टाग्राम (Instagram), व्हाट्स ॲपवरून (whats app) पैसे मागण्याचे प्रकार वाढले आहेत. असाच एक प्रकार नाशिकच्या तरुणासोबत घडला आहे. फिर्यादी पुरुषाचे फेसबुकवर खाते आहे. ६ मार्चला त्यांना पूनम शर्मा नावाच्या महिलेची रिक्वेस्ट आली. फिर्यादी तरुणाने ती रिक्वेस्ट स्वीकारली. त्याच्या दोन दिवसांनंतर या तरुणीने तरुणाचा व्हॉटस ॲप नंबर घेत त्यावर व्हिडिओ कॉल केला. मात्र, सदर व्हिडिओ कॉलमध्ये एक महिला विवस्त्र अवस्थेत बसून अश्लील हावभाव करत होती. या वेळी हा व्हिडिओ रेकॉर्ड करण्यात येत होता. सदर तरुणास हा व्हिडिओ व्हायरल करण्याची व फेसबुकवरील मित्रांना पाठविण्याची धमकी दिली. तसेच, सदर व्हिडिओ इतरत्र न पाठविण्याची धमकी देऊन वारंवार पैशांची मागणी केली. फसवणूक झाल्याचे लक्षात आल्यानंतर त्याने पोलिसांकडे धाव घेतली. याप्रकरणी सायबर पोलिसांनी गुन्हा दाखल केला आहे.