नाशिक : जगभरात कोरोनाचा थैमान सुरू आहे. एकीकडे कोरोना विषाणूशी लढा सुरू असताना, तरुणाईला बेरोजगारीच्या भीतीला सामोरे जावे लागत आहे. विशेषतः सर्वच क्षेत्रांतील युवकांमध्ये असुरक्षिततेची भावना निर्माण झाली आहे. त्यातच वेतनकपातीमुळे आर्थिक नियोजन बिघडल्याने तारेवरची कसरत करावी लागत आहे. 

युवांना संकटाची झळ

कोरोना विषाणूच्या वाढत्या संसर्गामुळे गेल्या काही दिवसांपासून व्यवसायावर परिणाम झालेला आहे. जागतिक मंदीमुळे आधीच बेरोजगारीचा प्रश्‍न गंभीर असताना, आता हे संकट आणखी गडद झालेले आहे. विशेषतः आयटी व सेवा क्षेत्रातील कंपन्यांकडून खर्च कपातीचा भाग म्हणून मनुष्यबळ कमी करण्यावर भर दिला जात आहे. देशाचे बलस्थान असलेल्या युवांना या संकटाची झळ बसायला लागली आहे. 

देशात बेरोजगारीचा दर 24 वर 

सेंटर फॉर मोनिटरिंग इकॉनॉमीने (सीएमआयई)मार्फत बेरोजगारी संदर्भात आकडेवारी जारी झाली आहे. त्यानुसार 22 मार्चला देशात बेरोजगारीचा दर 8.4 इतका होता. एका आठवड्यातच 29 मार्चला हा दर 23.8 वर पोचला. 10 मे व नंतर 17 मेस हा दर 24 वर पोचला आहे. 

हेही वाचा > 'भूक कशी लॉकडाउन करणार?'...शेवटी 'त्यांनी' रिक्षाचे टायर विकून भागला घरखर्च!

सध्या कंपनीने "वर्क फ्रॉम होम' दिले आहे. ऑफिसच्या तुलनेत काम अधिक दिले जाते. मात्र लॉकडाउन सुरू झाल्यापासून पगार मिळालेला नाही. त्यामुळे अनेक आर्थिक समस्या येत आहेत. - निवेदिता वाटपाडे 

लग्न होऊन एक वर्ष झाले आहे. आम्ही दोघे नोकरी करत असल्याने आर्थिक चणचण भासली नाही. मात्र आता लॉकडाउनमुळे गृह व वाहन कर्जाचे हप्ते भरण्यात अडचणी येत आहे. भविष्याची चिंता आता सतावत आहे. - अश्‍विनी जाधव 

कंपनीतून अनेक सहकाऱ्यांना काढण्यात आले आहे. त्यामुळे कळत-नकळत कामाचा व्याप वाढला आहे. घर आणि कार्यालय असे दोन्ही सांभाळणे अधिक अवघड झाले आहे. - मयूर गायकवाड 

हेही वाचा > एमएचटी-सीईटी परीक्षेच्या अर्जासाठी अंतिम मुदतवाढ; सीईटी सेलचा निर्णय