नाशिक : त्रिमूर्ती चौक व मायको सर्कल येथील उड्डाणपुलासंदर्भात भाजप नगरसेवक मुकेश शहाणे यांनी दाखल केलेल्या याचिकेवर उच्च न्यायालयाने मंगळवारी (ता. २५) सुनावणी ठेवली आहे. यासंदर्भात महापालिकेला म्हणणे मांडण्याची नोटीस पाठविण्यात आली आहे.

मायको सर्कल व त्रिमूर्ती चौक येथे उड्डाणपूल बांधला जात आहे. सुमारे अडीचशे कोटी रुपये किमतीच्या या पुलावरून अनेक वाद-विवाद झाले. नागरिकांचा विरोध, वाहतूक सर्वेक्षण न करताच उड्डाणपूल तयार केला जात असल्याच्या आरोपाने वादाला सुरवात झाली. मायको सर्कल येथे उड्डाणपूल आवश्‍यक असला, तरी त्रिमूर्ती चौकातील उड्डाणपुलाची आवश्‍यकता नसतानाही तो मंजूर करण्यात आल्याने अनेकांनी आश्‍चर्य व्यक्त केले. तर स्थानिक व्यावसायिकांनी देखील रोष व्यक्त करत आंदोलनाची भूमिका घेतली. श्रेयवाद सुरू झाला. भाजपच्या नेत्यांनी पुलाचे श्रेय घेतले. त्यानंतर सिमेंटच्या प्रतवारीवरून वाद झाला. तब्बल ४४ कोटी रुपये वाढविण्यात आल्याने अनेकांनी तोंडात बोटे घातली.

उड्डाणपुलाच्या फेरबदलात स्टार रेटची अट टाकताना नव्याने मंजुरी दिल्याने पुलाच्या संरचनेचा प्रश्‍न निर्माण झाला. संरचना बदलली जात असेल, तर नव्याने निविदा का काढली गेली नाही, असा प्रश्‍न उपस्थित झाला. विशिष्ट ठेकेदार डोळ्यांसमोर ठेवूनच प्रक्रिया राबविली जात असल्याचा आरोप श्री. शहाणे यांनी करत उच्च न्यायालयात आव्हान दिले. भाजपचे सभागृहनेते कमलेश बोडके, गटनेता अरुण पवार, जगदीश पाटील, राष्ट्रवादी काँग्रेसचे शहराध्यक्ष रंजन ठाकरे यांनी देखील पुलाच्या निविदा प्रक्रियेवर संशय व्यक्त करत प्रशासनाविरोधात दंड थोपटले. त्रिमूर्ती चौकात उड्डाणपूल तयार करताना ५८८ वृक्षांची तोड होणार असल्याचा दावा करत वृक्षप्रेमी नागरिकांनी शनिवारी (ता. २२) उंटवाडी पुलाजवळील हेरिटेज वृक्षांखाली चिपको आंदोलन केले. पर्यावरणमंत्री आदित्य ठाकरे यांच्याशी ट्विटरवरून संवाद साधताना वृक्षांची तोड होऊ न देण्याचे आवाहन केले. त्यानंतर आता पुलाच्या वादावर उच्च न्यायालयाने मंगळवारी सुनावणी ठेवल्याने कायद्याच्या चौकटीतच वाद मिटणार असल्याचे स्पष्ट झाले आहे.

मनसे जाणार न्यायालयात

२००५ पासून त्रिमूर्ती चौक ते सिटी सेंटर मॉलदरम्यान एकही अपघात झाला नाही. त्यामुळे पालिका प्रशासनाने वाहतूक कोंडीचा केलेला दावा चुकीचा असून, ठराविक लोकांना डोळ्यांसमोर ठेवून सिडकोत उड्डाणपूल उभारला जात असल्याचा आरोप मनसेचे शहराध्यक्ष दिलीप दातीर यांनी केला. त्याऐवजी शहरात लिंक रस्ते तयार करून वाहतूक वळविण्याची व्यवस्था करण्याची मागणी करतानाच या उड्डाणपुलाविरोधात न्यायालयात धाव घेणार असल्याचेही त्यांनी सांगितले.