नाशिक : गेल्या काही दिवसांपासून एफडीएनं (FDA) नाशिकमध्ये (Nashik) धडक कारवाई सुरु केलीय. आता नाशकात पुन्हा अन्न आणि औषध विभागानं (Food and Drug Department) वेगवेगळ्या ठिकाणी छापेमारी करत तब्बल 1 कोटींचं खाद्यतेल जप्त केलंय. या कारवाईत मोठ्या प्रमाणात निकृष्ट आणि भेसळयुक्त दर्जाचं खाद्य तेल जप्त करण्यात आलंय.

पथकानं वेगवेगळ्या ठिकाणी छापेमारी करत ही कारवाई केलीय. नाशिकमध्ये उच्च प्रतीचं खाद्यतेल असल्याचं भासवून कमी दर्जाचं तेल ग्राहकांच्या माथी मारलं जात असल्याचा संशय अन्न आणि औषध विभागाला होता. यावेळी त्यांनी छापा टाकून ही कारवाई केलीय.

मिळालेल्या माहितीनुसार, शिंदे गावाजवळच्या माधुरी रिफायनर्स कारखान्यावर अन्न आणि औषध प्रशासनाच्या पथकानं छापा टाकला. यावेळी तेलाच्या डब्यांवर फोर्टीफाइड तेलाचा उल्लेख प्रत्यक्षात होता. मात्र, पल्स एफचा सिम्बॉल नसल्याचं समोर आलं. या छाप्यात १ कोटी १० लाख ११ हजार २८० रुपयांच्या खाद्य तेलाचा साठा जप्त करण्यात आलाय. दरम्यान, खाद्यतेल आणि वनस्पती तुपाचे 32 नमुने प्रयोगशाळेत तपासणीसाठी पाठवले आहेत.