म्हसरूळ (नाशिक) : कृषी उपन्न बाजार समितीतील कर्मचाऱ्यांच्या वेतनातील वाढीव महागाई भत्ता फरकाची रक्कम अपहार प्रकरणी समितीचे सभापती तथा माजी खासदार देवीदास पिंगळे यांच्यासह चौघा कर्मचाऱ्यांची नाशिक जिल्हा व सत्र न्यायालयाने निर्दोष मुक्तता केली आहे.

लाचलुचपत प्रतिबंधक विभागाच्या वतीने गेल्या सहा वर्षांपासून नाशिक जिल्हा व सत्र न्यायालयात हा खटला सुरू होता. बुधवार (ता.१३) रोजी जिल्हा न्यायालयात झालेल्या सुनावणीत न्यायालयाने सबळ पुराव्याअभावी पिंगळे यांच्यासह लिपिक दिनकर हिरामण चिखले, अकौटंट अरविंद जैन, स्टेनो विजय निकम या चौघांची निर्दोष मुक्तता केली. नाशिकसह अवघ्या सहकार व राजकीय क्षेत्राचे या खटल्याच्या निकालाकडे लक्ष लागून होते. दरम्यान, तत्कालीन पालकमंत्री गिरीश महाजन यांनी सत्तेचा दुरुपयोग करून राजकीय सुडबुद्धीतून माझ्यासह माझ्या कर्मचाऱ्यांवर केलेली कारवाई अखेर निष्फळ ठरली. न्यायदेवतेवर आमचा विश्वास होता आणि अखेर सत्याचाच विजय झाला, अशी प्रतिक्रिया माजी खासदार पिंगळे यांनी निकालानंतर व्यक्त केली.