नाशिक : सध्या कोरोना व्हायरसने देशभरात थैमान घातले आहे. कोरोना संबंधित माहिती देणारे अनेक संदेश सध्या सोशल मिडीयावर दिले जात आहेत. दरम्यान अनेक प्रकारची खोटी माहिती देखील अशा प्रकारे पसरवली जाते. अशाच एक संदेशाबद्दल नाशिकचे जिल्हाधिकारी सूरज मांढरे यांनी माहिती दिली आहे.

कोरोना रुग्ण शोधला म्हणजे शासनाकडून त्या पालिका, महापालिका व स्थानिक स्वराज्य संस्थेला दीड लाख रुपये मिळतात. त्यामुळे सध्या भरमसाट रुग्ण शोधले जात असल्याबाबत संदेश  सोशल मीडियावर फिरत आहे. या संदेशाविषयी विचारले असता नाशिकचे जिल्हाधीकारी मांढरे यांनी याविषयी माहिती देताना सांगीतले की, प्रत्यक्षात कोरोना रुग्ण शोधला की असे कुठलेही पैसे कुठल्याच स्थानिक स्वराज्य संस्थेला मिळत नसतात,  हा संदेश म्हणजे निव्वळ अफवा असल्याचे म्हटले आहे. 

हेही वाचा >  ब्रेकिंग : रस्त्यावर प्रसुती झालेल्या बाळंतीण महिलेवर डॉक्टरचा दबाव; "महिला रुग्ण व डॉक्टर" मधील वादग्रस्त संभाषणाचा VIDEO व्हायरल

योजनेविषयी इंटरनेटवर सविस्तर माहिती

ते पुढे म्हणाले की, कोरोनारुग्णापोटी ग्रामपंचायत, पालिका किंवा महापालिकेसह कुठल्याही स्थानिक स्वराज्य संस्थेला किंवा रुग्ण शोधला म्हणून कुठल्या अधिकाऱ्यांना पैसे मिळत नसतात. शासनाच्या महात्मा फुले जनआरोग्य योजनेत संबंधित सभासद पात्र ठरत असल्यास तो थेट एखाद्या रग्णालयात जाऊन उपचार घेतो. त्या योजनेचा लाभ घेतलेल्या रुग्णाच्या उपचाराचे पैसे थेट त्या रुग्णालयाला मिळतात त्याच्याशी कुठल्याच स्थानिक स्वराज्य संस्थेचा संबंध येत नाही. महात्मा फुले जनआरोग्य योजना हा काही कोरोनाच्या रुग्ण शोधण्याशी संबंधित विषय नाही. या योजनेविषयी इंटरनेटवर सविस्तर माहिती उपलब्ध आहे. त्यामुळेच त्याचा संबंध नाही. त्यामुळे असे जर काही संदेश असतील तर निव्वळ अफवाच आहे, असे स्पष्ट केले.

हेही वाचा > गोणीतून चिमुरड्याचा आवाज येताच ते थबकले...अमानवीय घटनेने नागरिकांत संताप

संपादन - रोहित कणसे