मनमाड (जि. नाशिक) : प्रवासी वाहतूक करताना जाणाऱ्या व शिर्डीकडे जात असलेल्या टाटा मॅजिक या गाडीने अचानक पेट घेतला. मनमाड येवला रोडवर अंकाई फाट्याजवळ ही घटना घडली. गाडीतून धूर निघत असल्याचे लक्षात येताच चालकाने प्रसंगावधान राखून ८ प्रवाशांना उतरविले. चालकाच्या प्रसंगावधानामुळे जीवितहानी टळली. आगीत गाडी जळून खाक झाली. (Four wheeler caught fire near Ankai Fata Nashik News)

हेही वाचा : जोखमीचे भान राखूनच करा SIP मध्ये गुंतवणूक

मनमाड रेल्वे स्थानकातून शिर्डीसाठी ७ ते ८ प्रवासी घेऊन टाटा मॅजिक ही प्रवासी वाहतूक करणारी गाडी मनमाडकडून शिर्डीकडे भरधाव निघाली. मनमाडहून गाडी निघाली असता मनमाड येवला रस्त्यावर अंकाई फाट्याजवळ रस्त्याने जात असताना गाडीतून धूर निघत असल्याचे चालकाच्या लक्षात आले.

गाडीत काही तरी बिघाड झाला असावा किंवा गाडी जास्तच गरम झाली असावी त्यामुळे गाडी पेट घेऊ शकते हे लक्षात आले असता, चालकाने प्रसंगावधान दाखवत अंकाई फाट्याजवळ गाडी रस्त्याच्या कडेला थांबवून उभी करत गाडीत बसलेले सर्व प्रवासी तातडीने उतरवून देऊ त्यांना सुरक्षित ठिकाणी नेले.

चालकाने गाडीखाली उतरून पाहणी करीत असताना इंजिनमध्ये आग लागली. या घटनेमुळे रस्त्यावर काही काळासाठी वाहनांच्या रांगा लागल्या होत्या. आगीची माहिती मिळताच मनमाड नगरपालिकेच्या अग्निशमन दलाने तत्काळ धाव घेत आग विझविली. सर्व प्रवासी उत्तर प्रदेश येथून रेल्वेने मनमाडला आले व मनमाड येथून शिर्डी येथे खासगी वाहनाने जात असताना ही दुर्घटना घडली.