म्हसरूळ (नाशिक) : रेल्वेत नोकरी लावून देतो, असे सांगत बनावट ऑर्डर तयार करून नाशिकमध्ये मामा-भाच्याची तब्बल १८ लाख रुपयांची फसवणूक केल्याचा प्रकार समोर आला आहे. याप्रकरणी पंचवटी पोलीस ठाण्यात दोघा संशयितांविरोधात गुन्हा दाखल करण्यात आला आहे. काय घडले नेमके?

रेल्वेत नोकरीच्या अमिषाने मामा-भाच्याला १८ लाखांना गंडा

याबाबत पोलिसांनी दिलेली माहिती अशी की, शहर वाहतूक शाखेत कार्यरत रमेश मोतीगिरी गोसावी ( रा. नाशिक) आणि सचिन भाऊसाहेब म्हस्के (रा. वैजबाभूळ, ता. पाथर्डी, जि. अहमदनगर) या दोघा संशयितांनी १ नोव्हेंबर २०१४ ते १२ मे २०१६ या दरम्यान बाबाजी रामजी केदारे (रा. हनुमाननगर, पंचवटी) आणि त्यांचा भाचा स्वप्निल महेंद्र बागूल यांना रेल्वेत नोकरी लावून देतो, असे अमिष दाखवून त्यांचा विश्वास संपादन केला.

हेही वाचा - शुभमंगल सावधान आणि 'त्यांच्या' पासूनही जरा सावधान! टार्गेट सप्तपदीचा मुहूर्त

पंचवटी पोलिसांत धाव घेत फिर्याद दाखल

'इस्टर्न रेल्वे, गव्हर्नमेंट ऑफ इंडिया' या नावे 'टीसी' या पदाची बनावट ऑर्डर तयार करून ती खरी असल्याचे भासवत फिर्यादी यांच्याकडून वेळोवेळी प्रत्येकी ९ लाख असे एकूण १८ लाख रुपये उकळले. मात्र आपली फसवणूक झाल्याचे लक्षात येताच फिर्यादींनी संशयितांकडे दिलेल्या रकमेची वेळोवेळी मागणी केली, मात्र नेहमी उडवाउडवीची उत्तरे मिळाल्याने अखेर बाबाजी रामजी केदारे यांनी पंचवटी पोलिसांत धाव घेत फिर्याद दाखल केली. याप्रकरणी वरिष्ठ पोलीस निरीक्षक अशोक भगत यांच्या मार्गदर्शनाखाली सहायक पोलीस निरीक्षक एम. एस. शिंदे पुढील तपास करीत आहे.

हेही वाचा - निनावी पत्रावरून पोलीसांनी लावला शोध, हाती लागली धक्कादायक माहिती