नाशिक : एटीएम कार्डची अदलाबदल करून वृद्धाच्या बॅंक खात्यातून सुमारे ६८ हजार रुपये परस्पर काढल्याचा प्रकार रविवारी (ता. ३) उघडकीस आला. भद्रकाली पोलिसांत संशयिताविरुद्ध फसवणुकीचा गुन्हा दाखल झाला. 

काय घडले नेमके?
हबीब बेग मोगल बेग मिर्झा (वय ६९, रा. अशोका मार्ग) गुरुवारी (ता. ३१) शिवाजी रोडवरील एटीएम केंद्रात रक्कम काढण्यासाठी गेले. त्यात पैसे नसल्याने ते द्वारका येथील स्टेट बॅंकेच्या एटीएममध्ये गेले. त्या ठिकाणी त्यांनी दोन ते तीन वेळा प्रयत्न करूनही रक्कम निघाली नाही. त्यांच्या मागे असलेल्या तरुणाने रक्कम काढून देण्याचा बहाणा करत त्यांचे कार्ड स्वत:कडे घेऊन पैस काढून देत असल्याचे भासविले. एटीएम यंत्राचे कीबोर्ड नादुरुस्त असल्याचे सांगून त्यांना शेजारीच बँकेची शाखा आहे. तेथे जाऊन चौकशी करण्यास सांगितले. ते बॅंकेत गेले असता, त्यांच्या मोबाईलवर १० ते १५ मिनिटांत २९ हजार ३८ रुपयांची रोकड आणि ३९ हजार ९२९ हजारांची एटीएम कार्डद्वारे खरेदी असे एकूण ६८ हजार ९६७ हजारांची रक्कम काढल्याचे संदेश आले.

हेही वाचा> दिव्यांग पित्याचे मुलाला अभियंता बनविण्याचे डोळस स्वप्न; कॅलेन्डर विक्रीतून जमवताय पै पै, असाही संघर्ष

पैसे काढून देण्याच्या बहाण्याने एटीएम कार्ड ताब्यात

रक्कम काढली किंवा खरेदी केली नाही, तरी रक्कम काढल्याचे संदेश आल्याने वृद्धास धक्का बसला. काही वेळ विचार केल्यानंतर त्यांनी एटीएम कार्ड बारकाईने बघितले. त्यांच्या लक्षात आले, की त्यांच्याकडे असलेले कार्ड त्यांचे नाही. गुरुवारी (ता. ३१) रक्कम काढण्यासाठी एटीएममध्ये गेलो असताना, तरुणाने पैसे काढून देण्याच्या बहाण्याने त्याचे एटीएम कार्ड त्याच्याकडे घेतले होते. त्यानंतर त्याने नजर चुकवून कार्ड आदलाबदल करून बनावट कार्ड दिल्याचे समजले. त्यांनी भद्रकाली पोलिसांना घडलेल्या प्रकाराची माहिती दिली. 

हेही वाचा> गॅस गिझर भडक्यात बाथरूममध्ये तरुणाचा गुदमरून मृत्यू; नववर्षाच्या पहिल्याच दिवशी पाटील कुटुंबात आक्रोश