नाशिक : बेकायदेशीररीत्या गावठी कट्टा विक्री करणाऱ्या तिघांना दरोडा व शस्त्रविरोधी पथकाने अटक केली आहे.

चिन्मय केशव काकड (२६, रा. काकड मळा, जुना चांदशी रोड, मखमलाबाद रोड, नाशिक), रितेश अनिल बागूल (रा. आडगाव नाका, पंचवटी), राज प्रल्हाद मदोरिया ऊर्फ प्रिन्स (रा. जाधव कॉलनी, पंचवटी) अशी तिघा संशयितांची नावे आहेत. (Gavathi pistol selling three arrested Nashik Crime News)

हेही वाचा : देशातले ३२ म्युच्युअल फंडांचं व्यवस्थापन आहे महिलांच्या हाती...

गुन्हे शाखेचे उपायुक्त प्रशांत बच्छाव, सहायक आयुक्त वसंत मोरे यांच्या सूचनेनुसार, दरोडा व शस्त्रविरोधी पथकाने गावठी कट्टे बाळगणाऱ्यांची माहिती काढली. पथकाचे हवालदार विजयकुमार सूर्यवंशी यांना म्हसरूळ हद्दीत चिन्मय काकड याच्याकडे गावठी कट्टा असून तो मखमलाबाद गावात येणार असल्याची माहिती मिळाली होती.

त्यानुसार सहाय्यक निरीक्षक किरण रौंदळे व हवालदार शमशुद्दीन शेख, श्रीशैल सवळी, मोहन देशमुख, कडूबा पाटील, संदीप डावरे, प्रफुल्ल गांगुर्डे, विशाल जोशी यांनी सापळा रचून चिन्मयला ताब्यात घेऊन अंगझडती घेतली असता, १ गावठी कट्टा, एक जिवंत काडतूस, एक निकामी पुंगळी मिळून आली.

तसेच रितेश बागूल व राज मदोरिया यांनी गावठी कट्टा व काडतुसांची खरेदी-विक्री केल्याचे तपासात समोर आले आहे. म्हसरूळ पोलिस ठाण्यात गुन्हा दाखल करण्यात आला आहे.