Maratha Reservation : मराठा समाजाला आरक्षण देण्यासाठी राज्यातील ट्रिपल इंजिन सरकार कटिबद्ध आहे. मराठा समाजाला टिकेल अशा पद्धतीचे आरक्षण देण्यासाठी सरकारला थोडासा वेळ लागेल; परंतु टिकेल असेच आरक्षण देऊ, असा दावा ग्रामविकास व पर्यटनमंत्री गिरीश महाजन यांनी मंगळवारी (ता. २४) येथे केला.

त्रिरश्मी लेणी, बुद्ध स्मारक येथे बोधी वृक्षाच्या रोपणाचा कार्यक्रम झाला, या वेळी प्रमुख पाहुणे म्हणून महाजन बोलत होते. (Girish Mahajan statement about maratha reservation nashik news)

ते म्हणाले, की मराठा समाजाला आरक्षण देण्यासाठी युद्धपातळीवर प्रयत्न केले जात आहेत. मनोज जरांगे-पाटील यांनी ४० दिवसांची मुदत दिली. आम्ही आरक्षण देण्यासाठी न्यायमूर्ती शिंदे यांच्या अध्यक्षतेखाली समिती स्थापन केली.

या समितीचे काम सुरू आहे. न्यायालयात टिकणारे आरक्षण द्यायचे असेल तर कायदेशीर आधार द्यावा लागेल. त्यासाठी थोडा वेळ द्यावा लागेल. सरकार आरक्षण देण्यासाठी सकारात्मक आहे. आरक्षण आमचेच सरकार देईल. आरक्षणाबाबत चर्चा ही सुरू राहिली पाहिजे, चर्चेतून मार्ग निघेल. मात्र, पुन्हा उपोषणाला बसून, शरीराला ताण देऊन फार काही उपयोग होणार नाही.

सरसकट कुणबी प्रमाणपत्राची काही ठिकाणी आवश्यकता नाही, असा मतप्रवाह आहे. परंतु, मराठवाड्यात त्याची आवश्यकता आहे. त्याचा समिती अभ्यास करीत आहे. अजून किती दिवस लागतील, हे मला सांगता येणार नाही.

आमच्या सरकारवर लोकांचा विश्वास असल्याने आमच्या काळात मोर्चे निघत असल्याचे ते म्हणाले. माजी खासदार नीलेश राणे यांच्या निवृत्तीबाबत महाजन यांनी आश्चर्य व्यक्त केले. त्यांनी असा निर्णय कसा घेतला, असे महाजन म्हणाले.

‘एमडी’चे महानायक तुमचेच

राज्यात अडीच वर्षे महाविकास आघाडीची सत्ता होती. या सत्तेतील गृहमंत्री अनिल देशमुख १०० कोटींची मागणी करीत होते. त्यामुळे ‘एमडी’चे महानायक असलेले ललित पाटील हे तुमचेच पदाधिकारी होते, असा आरोप महाजन यांनी केला. आमचे सरकार या ड्रग्जची पाळेमुळे नष्ट करण्याचे काम करीत असल्याचा दावा त्यांनी केला.