नाशिक : शहर जिल्ह्यात निर्बंध शिथिल (lockdown) झाल्यानंतर दोन आठवड्यांपासून कोरोनाची रुग्णसंख्या (corona patients) वाढत आहे. संख्या हजाराच्या खाली येत नसून उलट या आठवड्यात शंभराने रुग्ण वाढले. त्यामुळे नागरिकांनी कोरोना रुग्णांची संख्या वाढू नये यासाठी काळजी घ्यावी, नियमांचे कठोरपणे पालन करावे, असे आवाहन पालकमंत्री छगन भुजबळ यांनी केले. भुजबळ यांच्या अध्यक्षतेखाली झालेल्या कोरोनाविषयी साप्ताहिक आढावा बैठकीत ते बोलत होते. जिल्हाधिकारी सूरज मांढरे, पोलिस आयुक्त दीपक पांडे, महापालिका आयुक्त कैलास जाधव, जिल्हा परिषदेच्या मुख्य कार्यकारी अधिकारी लीना बनसोड, पोलिस अधीक्षक सचिन पाटील आदी अधिकारी होते.

राज्यातील शाळा बंद ठेवण्याचा निर्णय

भुजबळ म्हणाले, ‘निर्बंध शिथिल झाल्यापासून कोरोनाने पुन्हा डोके वर काढले आहे. ऑक्सिजन बेडच्या वापराचे प्रमाण १.३५ टक्के, तर मृत्यूचे प्रमाण २.७ टक्के असले तरी रुग्णसंख्या हजाराच्या खाली नाही, हेही वास्तव आहे. उलट या आठवड्यात अकराशेच्या पुढे गेली आहे. तिसऱ्या लाटेच्या तोंडावर शहरात २८९, तर ग्रामीणला १३७ टन ऑक्सिजनची सोय करण्यात आली आहे. ऑक्सिजन टॅंकरची संख्या पाचपर्यंत वाढविली आहे. लसीकरणाचे प्रमाण २८ टक्के आहे. टास्क फोर्सने राज्यातील शाळा बंद ठेवण्याचा निर्णय घेतला आहे. त्यामुळे नाट्यगृह, शाळा आणि धार्मिक स्थळ मात्र बंदच राहातील, असेही स्पष्ट केले.

तारीख रुग्णसंख्या

३० जुलै १,०३०

८ ऑगस्ट १,०७६

१३ ऑगस्ट १,१२७