नाशिक / येवला : "माझ्या कुटुंबात घडलेला हा प्रकार गंभीर आहे. लक्षणे नसल्याने आम्ही वेळीच ‘सेकंड ओपिनियन’ म्हणून दुसऱ्यांदा तपासणी केली. असे केले नसते तर आजही आम्ही कोविडचे उपचार घेत असतो". रुग्णांच्या भावनांसह जिवाशी खेळण्याचा हा प्रकार आहे. आमदारांसोबत घडलेल्या त्या प्रकारानंतर याची सखोल चौकशी करण्याची मागणी करण्यात येत आहे.

अहवालांचा गोंधळ चव्हाट्यावर; किशोर दराडेंची चौकशीची मागणी 

या प्रकारामुळे कोरोना अहवाल अन्‌ उपचाराचे बाजारीकरण पुन्हा चर्चेत आले. नांदगाव येथे सरपंच नियुक्तीच्या निमित्ताने नातेवाइकांसह तालुक्यातील कार्यकर्त्यांच्या संपर्कात आल्याने आमदार नरेंद्र दराडे यांनी पुणे येथील खासगी लॅबमध्ये तपासणी केली. अहवाल पॉझिटिव्ह निघाल्याने ते मुंबईतील फोर्टिस हॉस्पिटलमध्ये दाखल झाले. मात्र, लक्षणे नसल्याने तेथे उपचारापूर्वी घेतलेल्या स्वॅबचा अहवाल निगेटिव्ह आल्याने त्यांना डिस्चार्ज देण्यात आला. दराडे यांचे बंधू, सुना, नातवंडे, मुली, जावई असे एकूण ३० ते ३५ जणांचे कुटुंब असून, संपर्कात आल्याने आमदार किशोर दराडे यांच्यासह २२ जणांचे स्वॅब येथील आरोग्य विभागाने रविवारी (ता. १९) घेतले. याचा अहवाल नाशिकच्या शासकीय लॅबमधून मंगळवारी (ता. २१) सायंकाळी आला. त्यात २२ पैकी नऊ अहवाल पॉझिटिव्ह आले. संपर्कातील अनेकजण निगेटिव्ह आल्याने व कुणालाही लक्षणे नसल्याने सर्वांची खासगी लॅबमध्ये तपासणी करण्याचा निर्णय घेण्यात आला. त्यानुसार मुंबईतील एका लॅबचे पथक येवल्यात बोलावून, बुधवारी या नऊ जणांचे स्वॅब घेतले. त्यांचे अहवाल गुरुवारी (ता.२३) निगेटिव्ह आले. 

अगोदर पॉझिटिव्ह आलेले निम्मे कुटुंब, नंतर मात्र निगेटिव्ह

अगोदर पॉझिटिव्ह आलेले निम्मे कुटुंब, नंतर मात्र निगेटिव्ह आल्याने सर्वांनाच मनस्ताप सहन करावा लागला. विशेषत: सर्वसामान्य नव्हे, तर दोन आमदार असलेल्या येथील दराडे कुटुंबीयांच्याच बाबतीत हा प्रकार घडला. दरम्यान, या गंभीर प्रकाराची सखोल चौकशी करण्याची मागणी आमदार किशोर दराडे यांनी गुरुवारी (ता.२३) पत्रकार परिषदेत केली. 

हेही वाचा > धक्कादायक! 'त्या' क्षणाला न बायको आठवली न लेकरं...दुर्देवी घटना

गोंधळाची चौकशी करा : दराडे 
पॉझिटिव्ह-निगेटिव्हचा हा गोंधळ सर्वसामान्यांच्या जिवाशी खेळणारा आहे. अनेकजण निगेटिव्ह असताना उपचार घेत असतील, तर ही बाब गंभीर आहे. लॅबच्या या हलगर्जीची चौकशी करावी, अनेक हॉस्पिटल विमा पॉलिसी असलेल्यांना उपचारास खाटा उपलब्ध नसल्याचे कारण देत दाखल करून घेत नाही. ‘कॅश असेल तर बेड’ अशी स्थिती असून, यावर नियंत्रण आणावे व हा सावळा गोंधळ थांबण्याची मागणी मुख्यमंत्री उद्धव ठाकरे यांच्याकडे केली असून, शुक्रवारी नाशिक येथे शरद पवार व आरोग्यमंत्री डॉ. राजेश टोपे यांनाही निवेदन देणार असल्याचे श्री. दराडे यांनी सांगितले. 

हेही वाचा > निरक्षर आई- बापाची दिव्यांग लेक सुनिताने शेवटी करून दाखवलचं! पालकांचे आनंदाश्रु थांबेना...

असे केले नसते तर आजही आम्ही कोविडचे उपचार घेत असतो

माझ्या कुटुंबात घडलेला हा प्रकार गंभीर आहे. लक्षणे नसल्याने आम्ही वेळीच ‘सेकंड ओपिनियन’ म्हणून दुसऱ्यांदा तपासणी केली. असे केले नसते तर आजही आम्ही कोविडचे उपचार घेत असतो. रुग्णांच्या भावनांसह जिवाशी खेळण्याचा हा प्रकार असून, आरोग्य यंत्रणेने अशी हलगर्जी कुणाच्याही बाबतीत करू नये. यासंदर्भात उपाययोजनेची मागणी आम्ही करणार आहोत. - नरेंद्र दराडे, आमदार 

संपादन - ज्योती देवरे