वणी (जि. नाशिक) : ओझरखेड - वरखेडा रस्त्यावरील ओझरखेड शिवारात उनंदा नदीवर असलेला पुल (Bridge) वाहून गेला असून ओझरखेड शिवारातील शेतकरी व ग्रामस्थांचे दळणवळण ठप्प झाले असून शेतकरी व विद्यार्थ्यांंचे हाल होत आहे. (Half of bridge on Ozarkhed Varkheda road was washed away nashik Latest Marathi news)

गेल्या दहा ते बारा दिवसांपासून दिंडोरी तालुक्यात संततधार पाऊस होत असल्याने अनेक ठिकाणच्या नद्या, नाल्यांना पूर आल्याने अनेक नुकसान यादी समोर येत आहे. त्यात अतिमहत्त्वाचा रस्ता म्हणजे ओझरखेड ते वरखेडा येथील पूल वाहून गेल्याने दोन्ही गावांचा जाण्या-येण्याचा संपर्क तुटल्याने प्रवासी वर्गाची मोठी कुचंबणा होत आहे.

ओझरखेड धरण ओव्हरफ्लो झाल्याने धरणाच्या सांडव्यातून मोठ्या प्रमाणात पाण्याचा विसर्ग उनंदा नदीत होत असल्याने या नदीवर कमी उंचीचा असलेला ह्या पुलाचा अर्धा भाग पाण्याच्या वेगाने वाहून गेला आहे. वरखेडा, ओझरखेड शिवारात असलेले शेतकऱ्यांना व विद्यार्थ्यांना वणीकडे किंवा ओझरखेड गावात येण्यासाठी तसेच वणी, ओझरखेड गांव बाजूने वरखेडा येथे जाण्याचा जवळचा मार्ग असल्याने या रस्त्यावरुन वाहनांची मोठी वर्दळ असते.

परंतु सध्या संततधार पावसाने येथील पूल वाहून गेल्याने विद्यार्थी, नागरिक, प्रवासी, शेतकऱ्यांना येथून प्रवास करताना जीव मुठीत घेऊन प्रवास करावा लागत आहे. सुमारे पंधरा वर्षांपूर्वी बांधलेला पुलाचे काम निकृष्ट दर्जाचे झाल्यानेच हा पुल वाहून गेल्याचा आरोप ओझरखेडचे सरपंच गंगाधर निखाडे व ग्रामस्थांनी केला असून शेतकरी, विद्यार्थ्यांची होत असलेले हाल, गैरसोय लक्षात घेवून शासनाने नव्याने अधिक उंचीचा असलेला पुल बांधून द्यावा अशी मागणी केली आहे.