Har Ghar Tiranga : ‘घरोघरी तिरंगा’ मोहिमेत शाळांच्‍या सहभागाबाबत शिक्षण विभागाच्या परिपत्रकाने गोंधळ उडाला आहे. शाळांनी आपपाल्या परीने अर्थ लावत कुठे तीन दिवस, तर कुठे फक्त स्वातंत्र्यदिनीच ध्वजवंदन करण्यात येईल, असे रविवारी (ता. १३) बघायला मिळाले.

एकाच दिवशी ठराविक अंतराच्‍या फरकाने ध्वजवंदनाबाबत जारी केलेल्‍या दोन सूचनापत्रांमुळे हा गोंधळ निर्माण झाला आहे. (Har Ghar Tiranga Campaign ZP education department made mess of flag waving nashik)

देशाचा स्‍वातंत्र्य दिन साजरा होत असताना ‘घरोघरी तिरंगा’ मोहिमेंतर्गत रविवार (ता. १३)पासून स्‍वातंत्र्य दिनाच्‍या दिवसापर्यंत असे तीन दिवस ध्वजवंदन केले जात आहे. त्‍यानुसार शासकीय कार्यालये व आस्‍थापनांमध्ये रविवारी ध्वजवंदन करण्यात आले.

शाळांनाही या मोहिमेत सहभागी होण्याचे सूचनापत्र जिल्‍हा परीषदेच्‍या शिक्षण विभागाने जारी केले. शैक्षणिक संस्‍थांच्‍या पातळीवरून शाळांना हे पत्र पाठवत कार्यक्रमात सहभागी होण्याच्‍या सूचना केल्‍या होत्‍या.

हेही वाचा : Credit Card फसवणूक....काय घ्याल काळजी?

शिक्षण विभागाने पत्र जारी केल्‍याच्‍या अवघ्या काही तासांत सुधारित परिपत्रक काढले. केवळ स्‍वतंत्र्यदिनीच ध्वजवंदन करण्याच्‍या सूचना या सुधारित सूचनापत्रात देण्यात आल्‍या आहेत. मात्र सुधारित आदेश प्राप्त न झालेल्‍या शाळांनी रविवारी ध्वजवंदन केल्‍याचे चित्र शहरासह जिल्‍हाभरातील काही शाळांमध्ये बघायला मिळाले.

आता या शाळांकडून एकूण तीन दिवस ध्वजवंदन केले जाणार आहे. सुधारित सूचनापत्र वेळीच प्राप्त झालेल्‍या शाळांकडून केवळ स्‍वातंत्र्यदिनीच ध्वजवंदन कार्यक्रम घेण्याचे नियोजन आखले आहे.