कसबे सुकेणे (जि. नाशिक) : गेल्या आठवडाभरापासून सतत ढगाळ हवामान व जोरदार पावसाने हजेरी लावल्यानंतर द्राक्ष उत्पादक शेतकऱ्यांची चिंता कमी होते न होते तोच गुरुवारी (ता.७) पुन्हा कसबे सुकेणे परिसराला जोरदार पावसाने झोडपून काढले. दुपारी तीनपासून कमी - अधिक प्रमाणात परिसरात पाऊस होत असून, मध्येच जोरदार पावसाच्या सरी कोसळत आहे. 

द्राक्ष उत्पादक शेतकऱ्यांचे धाबे दणाणले

गेल्या काही दिवसांपासून वातावरणात कमालीचा बदल झाला आहे. ढगाळ हवामानामुळे द्राक्ष, कांदा, गहू, हरभरा पिकांवर विविध रोगांचा प्रादुर्भाव वाढत आहे. त्यापासून बचाव करण्यासाठी शेतकरी धडपड करीत असताना गुरुवारी बेमोसमी पावसाने हजेरी लावून शेतकऱ्यांची डोकेदुखी वाढवली. पंधरा दिवसांपूर्वी देखील सतत ढगाळ वातावरण, सकाळचे दाट धुके व बेमोसमी पाऊस यामुळे अनेक द्राक्षबागांना तडे गेले होते. त्यातून द्राक्ष उत्पादक शेतकऱ्यांची लाखो रुपयांची हानी झाली होती. त्यातून शेतकरी सावरतो न सावरतो तोच पुन्हा बेमोसमी पावसाने हजेरी लावल्याने द्राक्ष उत्पादक शेतकऱ्यांचे धाबे दणाणले आहे. चालू स्थितीमध्ये अनेक द्राक्षबागा विक्रीसाठी तयार झाल्या आहेत. त्यामध्ये काळी जातीच्या द्राक्षाचे प्रमाण मोठे असून, मामा जम्बो, जम्बो, नानासाहेब पर्पल, शरद सीडलेस, फ्लेम आदी प्रकारचे द्राक्ष सध्या कसबे सुकेणे परिसरात मोठ्या प्रमाणात तयार झाली आहेत. येत्या आठ दिवसांमध्ये अनेक द्राक्षबागा सुरू होणार आहे. मात्र, त्यातच आता पावसाने हजेरी लावल्याने द्राक्ष उत्पादकांची चिंता वाढली आहे. 

हेही वाचा > मैत्रीत मोठा घात! मित्राच्याच डोक्यात घातला मोठा दगड; नशेत सांगितली धक्कादायक आपबिती

नुकसानीचा आकडा वाढणार... 

हवामान खात्यानेही शुक्रवारी (ता.८) पावसाचा इशारा दिला होता. त्यामुळे देखील द्राक्ष उत्पादक शेतकरी धास्तावले आहेत. बेमोसमी पावसामुळे शेतकऱ्यांना वेगवेगळ्या स्टेजमधील द्राक्ष बागांसाठी महागडी औषधे फवारावी लागणार असल्याने उत्पादन खर्चातही मोठ्या प्रमाणात वाढ होत आहे. पाऊस असाच सुरु राहिल्यास शेतकऱ्यांचे मोठे नुकसान होईल.  

हेही वाचा >  डोळ्यासमोर काळ अन् गळ्याभोवती बांधलेल्या स्टोलमुळे वाचली तरुणी; अंगावर काटा आणणारी घटना