Nashik News : शहरात प्राणांकित अपघातांची लक्षणीय वाढ पाहता पोलीस आयुक्तांनी विनाहेल्मेट व ट्रीपलसीट वाहनचालकांविरोधात धडक दंडात्मक कारवाईची मोहीम सुरू केली आहे.

गेल्या १२ दिवसांमध्ये वाहतूक शाखेने सुमारे साडेचार हजार विनाहेल्मेट तर, साडेचारशे ट्रीपलसीट दुचाकीचालकांविरोधात कारवाई करीत सुमारे २५ लाखांचा दंड वसूल केला आहे. (Helmetless triple seat drivers on radar 25 lakhs fine recovered in 2 weeks Nashik News)

शहर आयुक्तालय हद्दीमध्ये गेल्या काही दिवसात गंभीर स्वरुपाचे अपघात होऊन त्यात वाहतूक नियमांचे उल्लंघन केल्याने प्राणांकित अपघात झाल्याचे समोर आले आहे. पोलीस आयुक्त अंकुश शिंदे यांनी सदरची बाब गांभीर्याने घेत वाहतूक शाखेला शहरात कठोर कारवाईचे आदेश दिले.

त्यानुसार, वाहतूक शाखेच्या उपायुक्त मोनिका राऊत, सहायक आयुक्त डॉ. सचिन बारी यांच्या आदेशान्वये शहरात गेल्या १२ दिवसांपासून विनाहेल्मेट आणि ट्रीपलसीट दुचाकी चालकांना लक्ष करून दंडात्मक कारवाई केली जात आहे.

आयुक्तालयाच्या शहर वाहतूक शाखेच्या १ ते ४ शाखेंतर्गत सदरील दंडात्मक कारवाई करताना ४ हजार ३५९ जणांविरोधात विनाहेल्मेटची दंडात्मक कारवाई करीत २१ लाख ७९ हजार ५०० रुपयांचा दंड वसुल केला तर, ४५४ ट्रीपलसीटची कारवाई करीत ४ लाख ५४ हजार रुपयांचा दंड वसुल केला आहे.

८८ चालकांचे परवाने रद्द

दरम्यान, दंडात्मक कारवाई करूनही काही वाहनचालकांकडून वारंवार वाहतूक नियमांचे उल्लंघन केले जात असल्याचे वाहतूक शाखेच्या निदर्शना आले.

त्यामुळे ८८ चालकांचा वाहन चालविण्याचा परवानाच रद्द करण्यासंदर्भात प्रस्ताव प्रादेशिक परिवहन विभागाकडे (आरटीओ) सादर करण्यात आलेला आहे.

हेही वाचा : Credit Card फसवणूक....काय घ्याल काळजी?

दुचाकीस्वारांना आवाहन

वाहनचालकांनी वाहन चालविताना वाहतूक नियमांचे पालन करावे. विशेषत: दुचाकीचालकांनी विनाहेल्मेट परिधान करावे.

तसेच, ट्रीपलसीट वाहन चालवू नये. यामुळे स्वत:च्या जीवाला धोका उत्पन्न होतो. त्यामुळे दुचाकीचालकांनी हेल्मेट परिधान करण्याचे आवाहन शहर वाहतूक शाखेच्या वतीने करण्यात आले आहे.

कारवाई.......वाहने .............. दंड वसूल

विनाहेल्मेट... ४,३५९ ...........२१ लाख ७९ हजार ५०० रुपये

ट्रिपलसीट.....४५४................ ४ लाख ५४ हजार रुपये