नाशिक : लॉकडाऊनमुळे शहरात अडकलेल्या परराज्यातील विद्यार्थी, नागरिकांना परत त्यांच्या राज्यात जाण्यासाठी लागणाऱ्या आवश्‍यक परवानगी, वैद्यकीय प्रमाणपत्र एकाच ठिकाणी मिळणार आहे. त्यामुळे त्यासाठी होणारी फेऱ्यातून परप्रांतियांना दिलासा मिळणार आहे. त्याचप्रमाणे, रेल्वे-बसची व्यवस्थाही प्रशासनाच्या समन्वयातून एकाच ठिकाणी करण्यात येणार आहे. यासाठी संबंधितांनी ही प्रक्रिया करणे बंधनकारक असणार आहे. 

शासनातर्फे मूळ राज्यात पाठविण्याची व्यवस्था

कोरोनाच्या पार्श्‍वभूमीवर पोलिस आयुक्तालय हद्दीमध्ये लागू असलेल्या लॉकडाऊनमुळे परराज्यातील मजूर, विद्यार्थी, पर्यटक व नागरिक अडकून आहेत. त्यांना त्यांच्या मूळ राज्यात पाठविण्याची व्यवस्था शासनातर्फे केली जाते आहे. त्यासाठी या परप्रांतियांना आवश्‍यक परवानगी आणि वैद्यकीय प्रमाणपत्र बंधनकारक असून, ते मिळविण्याची पुरेशी माहिती नसल्याने या परप्रांतियांना अनेक ठिकाणी हेलपाटे मारावे लागत आहेत. त्यामुळे त्यांच्यावर मानसिक ताणही वाढतो आहे. याचसाठी नाशिक पोलिस आयुक्तालयातर्फे विशेष सूचना जारी करण्यात आलेल्या आहेत. त्यानुसार, ज्यांना परत आपल्या राज्यात जायचे आहे, त्या प्रवास करणाऱ्या नागरिकांचे नाव, सध्याचा पत्ता, आधार क्रमांक, मोबाईल क्रमांक व त्यांचा प्रवासाचा पत्ता अशी सर्व माहिती नजीकच्या पोलिस ठाण्यात जमा करावयाची आहे. सदरची माहिती जमा झाल्यानंतर संबंधित नागरिकांना शासनाच्या निर्णयानुसार रेल्वे वा राज्य परिवहन महामंडळाची एसटी बसेसमार्फत मध्यप्रदेश सीमेपर्यंत सोडण्यात येणार आहे. 

हेही वाचा > ह्रदय पिळवटून टाकणाऱ्या 'त्या' फोटोमागचे सत्य समजले.. तर तुमच्याही डोळ्यात येईल पाणी

वैद्यकीय तपासणीनंतरच रवाना

पोलीस ठाण्यात नोंद झालेल्या परराज्यातील प्रवाशांनी संबंधित पोलिस ठाणे, शासकीय यंत्रणेच्या आदेशानुसार दिलेल्या ठिकाणी वेळेवर हजर राहणे अनिवार्य असणार आहे. तसेच प्रवास सुरू होण्याच्या ठिकाणी त्याची महापालिका आरोग्य विभागातर्फे वैद्यकीय तपासणी, स्क्रीनिंग केल्यानंतरच त्यांना रवाना करण्यात येणार आहे. शासनाने दिलेल्या सूचनांचे काटेकोरपणे पालन होईल याबाबत या नागरिकांनी दक्षता घेणे आवश्‍यक आहे. त्यासाठी अनावश्‍यक गर्दी टाळून शासकीय यंत्रणेस सहकार्य करण्याचे आवाहन शहर पोलिसांतर्फे करण्यात आलेले आहे. 

हेही वाचा >  नाशिक औष्णिक वीज केंद्र लॉकडाउननंतर कायमचे लॉक?