नाशिक : नाशिकमध्ये मल्टीमॉडेल लॉजिस्टिक पार्क उभारला जाणार असून, त्यासंदर्भात केंद्रीय नगरविकास मंत्र्यांसोबत महत्त्वाची ऑनलाइन बैठक मंगळवारी (ता. ८) होणार आहे. या बैठकीत जागेची चाचपणी, महापालिकेकडून पुरविल्या जाणाऱ्या सुविधा आदींबाबत चर्चा होणार आहे.

केंद्रीय नगरविकास मंत्री हरदीपसिंग पुरी व राज्यमंत्री कौशल किशोरे नवी दिल्लीतील नगरविकास मंत्रालयाच्या निर्माण भवनमधून ऑनलाइन संवाद साधणार आहेत. नाशिकबरोबरच वर्धा, मुंबई व ठाणे जिल्ह्यातील शासकीय संस्थांचे अधिकारी उपस्थित राहणार आहे. कच्चा, पक्क्या मालाची वाहतूक जलदगतीने होण्याबरोबरच वाढत्या शहरांमध्ये वाहतुकीच्या प्रश्‍नांमुळे निर्माण होणाऱ्या प्रदूषणाच्या समस्या कमी करण्यासाठी केंद्रीय रस्ते व वाहतूक मंत्री नितीन गडकरी यांनी मल्टीमॉडेल लॉजिस्टिक पार्कची संकल्पना मांडली आहे. केंद्रीय मंत्री गडकरी यांनी दिलेल्या सूचनेनुसार केंद्रीय नगरविकास विभागाने मल्टीमॉडेल लॉजिस्टिक पार्क उभारण्याचा निर्णय घेतला आहे.