नाशिक : नाशिकमध्ये दिवसेंदिवस सायकलचा वापर वाढत असून, पर्यावरणपूरक वातावरणासाठी ही बाब अत्यंत चांगली आहे. त्यामुळे नाशिक सायकलची राजधानी होण्यासाठी सज्ज आहे. शहरात सायकलचा वापर वाढण्यासाठी पायाभूत सुविधा पुरविल्या जाणार आहेत. त्याचाच एक भाग म्हणून त्र्यंबक नाका ते पपया नर्सरीदरम्यान १३ किलोमीटरचा तात्पुरता सायकल ट्रॅक तयार करण्याचा निर्णय स्मार्टसिटी कंपनीने घेतला आहे. 

त्र्यंबक नाका-पपया नर्सरीपर्यंत तात्पुरता सायकल ट्रॅक 

स्मार्टसिटी मिशन, केंद्र सरकारच्या गृहनिर्माण व शहरी कामकाज मंत्रालयातर्फे 'इंडिया सायकल्स फॉर चेंज चॅलेंज' हा उपक्रम हाती घेतला जाणार आहे. त्याबाबत माहिती देण्यासाठी स्मार्टसिटी कंपनीतर्फे वेबिनार घेण्यात आला. शहरातील सायकल असोसिएशन्स, क्रेडाई, आयमा, निमा, इंजिनिअर्स असोसिएशन, नाशिक फर्स्ट, नाशिक सायकलिस्ट्स असोसिएशनचे प्रमुख, नाशिक सायकलिस्ट्स फाउंडेशनचे अध्यक्ष, महाविद्यालयांचे प्रमुख तसेच प्रतिनिधींनी वेबिनारमध्ये सहभाग घेतला. या वेळी स्मार्टसिटी कंपनीचे सीईओ प्रकाश थविल यांनी माहिती दिली. शहरात सायकलचा वाढता वापर लक्षात घेता येथे सायकलिंगसाठी पायाभूत सुविधा उपलब्ध करून देणे गरजेचे आहे. त्याचाच एक भाग म्हणून त्र्यंबक नाका ते पपया नर्सरी व पपया नर्सरी ते त्र्यंबक नाका हा एकूण १३ किलोमीटरचा पॉपअप सायकल ट्रॅक अर्थात तात्पुरता सायकल ट्रॅक प्रस्तावित असल्याचे प्रकल्प व्यवस्थापक निखिल भोईर यांनी सांगितले. 

अशा सुविधा देण्याच्या सूचना

कामगार वर्गाचा विचार करता हा पॉपअप सायकल ट्रॅक पुढे एमआयडीसीमध्ये नेणे गरजेचे असल्याचे निमाचे अध्यक्ष शशिकांत जाधव यांनी सांगितले. त्याचबरोबर सायकलिंगच्या दृष्टीने सिडकोला अंबड व सातपूर एमआयडीसीसोबत जोडणे गरजेचे असून, कंपन्यांपर्यंत सायकल ट्रॅक नेल्यास त्याचा कामगारांना फायदा होईल, असेही ते म्हणाले. नाशिकमध्ये सायकलिस्ट्सची संख्या मोठी असून, त्यादृष्टीने फोकस करणे गरजेचे आहे. त्यासाठी निमा, आयमा, सर्वेक्षण आणि सर्वतोपरी मदत करण्यास तयार असल्याचे चेंबर ऑफ कॉमर्सचे अध्यक्ष संतोष मंडलेचा यांनी सांगितले. तसेच डॉ. विलास पाटील, डॉ. ढाके यांनी भविष्याचा विचार करून त्याप्रमाणे सायकलिंगच्या दृष्टीने शहरातील विविध भागांमध्ये पॉपअप सायकल ट्रॅक, स्लो झोन अशा सुविधा देण्याच्या सूचना केल्या. 

हेही वाचा > धक्कादायक! सासरच्यांनीच लेकीचा घातपात करुन विहिरीत फेकल्याचा पित्याचा आरोप; परिसरात खळबळ

सायकल्स फॉर चेंज चॅलेंज 

या उपक्रमांतर्गत पहिल्या ११ शहरांमध्ये येण्यासाठी नाशिक स्मार्टसिटीच्या माध्यमातून विविध स्तरांवर प्रयत्न सुरू आहेत. त्यात सायकलिंग अवेअरनेस, फ्रीडम राइड, सोशल मीडियाद्वारे प्रचार व प्रसिद्धी करण्यात येत आहे. तसेच पॉपअप ट्रॅकदरम्यान सायकलिस्ट्सना कोणत्या अडचणी येतात, हे जाणून घेण्यासाठी हँडलबार सर्वेसारखे उपक्रमही राबविण्यात येत असल्याची माहिती देण्यात आली.  

हेही वाचा > गाई चारायला गेलेल्या प्रशांतच्या नशिबी असे दुर्दैव; घटनेनंतर गावात भयाण शांतता

संपादन - किशोरी वाघ