नाशिक : (नाशिक रोड) जय भवानी रोडवर फर्नांडिस वाडीलगतच्या मोकळ्या भूखंडावर शुक्रवारी मध्यरात्री टोळक्‍याने सातपूर येथे राहणाऱ्या युवकाचा तीक्ष्ण हत्याराने खून केला. याप्रकरणी उपनगर पोलिसांत अज्ञात व्यक्तींविरुद्ध खुनाचा गुन्हा दाखल करण्यात आला.
अशी आहे घटना
मृत युवकाच्या खिशात ओळखपत्र मिळाले. त्यात प्रशांत शांतीलाल वाघ (वय 26, रा. व्यंकटेश अपार्टमेंट, राधाकृष्णनगर, अशोकनगर, सातपूर) असे नावे असल्याचे निष्पन्न झाले. जय भवानी रोडवरील फर्नांडिस वाडीलगत मोकळा भूखंड असून, तेथील एका वृक्षाखाली सिमेंटचे पाइप आहेत. मध्यरात्री या ठिकाणी काही युवकांमध्ये वादावादी सुरू होती. या वादाचा परिणाम पुढे शिवीगाळ व हाणामारीत झाला. त्यानंतर युवकाच्या गळा, डावा कान व हनुवटीजवळ तीक्ष्ण हत्याराने वार करून खून करण्यात आला. सकाळी दहाच्या सुमारास या ठिकाणी एका युवकाचा मृतदेह असल्याची माहिती उपनगर पोलिसांना मिळाली. वरिष्ठ निरीक्षक सुनील रोहोकले व त्यांचे सहकारी घटनास्थळी दाखल झाले. काही वेळाने श्‍वान पथकाला पाचारण करण्यात आले. परंतु आरोपींचा मार्ग मिळू शकला नाही. पोलिसांनी एकनाथ सातपुते (वय 46, रा. अशोकनगर, सातपूर) यांच्याशी संपर्क साधला.
साथीदारांनी वादातून त्याचा खून केल्याचा संशय
सातपुते यांनी शासकीय रुग्णालयात मृत युवकाला ओळखले. प्रशांत हा त्याच्या आई-वडिलांसह काही महिने सातपुते यांच्याकडे भाडेतत्त्वावर राहात होता. त्या वेळी त्याने त्या पत्त्याचे आधारकार्ड बनविले होते. पोलिसांच्या माहितीनुसार, प्रशांत वाघची पार्श्‍वभूमी गुन्हेगारी स्वरूपाची असून, त्याच्याविरुद्ध घरफोडी व अन्य गुन्हे दाखल आहेत. साथीदारांनी वादातून त्याचा खून केल्याचा पोलिसांना संशय आहे.
महिनाभरात तिसरा खून
महिनाभरात उपनगर पोलिस ठाण्याच्या हद्दीत तिसरा खून आहे. जेल रोड येथे पित्याने पाच वर्षांच्या मुलाच्या डोक्‍यात लाकडी बॅट मारून हत्या केली होती. त्यानंतर दोन दिवसांनी जेल रोडच्या दुर्गामंदिर परिसरात सुनेने सासूचा खून केला होता. त्या घटनेला महिना होत नाही तोच काल खुनाचा तिसरा प्रकार घडला. यातील दोन प्रकरणातील आरोपी तपासात निष्पन्न झाले. प्रशांत वाघ याच्या हत्येचे धागेदोरे पोलिसांना अद्याप मिळालेले नाहीत. प्रशांत सातपूर येथे राहात असतांना नाशिक रोडला मध्यरात्री कशासाठी आला होता, याबाबत पोलिस शोध घेत आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.