नाशिक : (म्हसरूळ) हिरावाडीतील 50 वर्षीय व्यक्तीचे बुधवारी (ता. 13) राहत्या घरी आजाराने नैसर्गिकरीत्या निधन झाले. परिसरातील डॉक्‍टरांनी मृत्यूचे प्रमाणपत्र देण्यास नकार दिला. त्यामुळे मृत व्यक्तीचे कुटुंबीय मृतदेह घेऊन जिल्हा शासकीय रुग्णालयात पोचले. तेथेही पोलिस पंचनामा असल्याशिवाय पुढील कार्यवाही केली जाणार नसल्याचे सांगण्यात आले. अखेर पंचवटी पोलिसांनी पोलिस पंचनामा दिला. त्यानंतर पुढील सोपस्कार पार पडले. या सर्व प्रकरणात त्या मृतदेहाची हेळसांड मात्र सुरूच राहिली. 

अशी आहे घटना

हिरावाडी येथील शिवकृपानगरमधील भोलेनाथ सोसायटीतील रहिवासी दिलीप सुधाराम गौड शर्मा (वय 50) यांचे बुधवारी (ता. 13) सकाळी नऊला निधन झाले. त्यांचा नैसर्गिक मृत्यू झाला असताना कोरोना विषाणूच्या संसर्गाच्या परिस्थितीत परिसरातील एकाही डॉक्‍टरांनी शर्मा यांच्या कुटुंबीयांना मृत्यू प्रमाणपत्र दिले नाही. मृत्यूचे प्रमाणपत्र नसल्यामुळे त्यांच्या मृतदेहावर अंत्यसंस्कार करणे शक्‍य नसल्याने शर्मा कुटुंबीयांची अडचण वाढली. शर्मा कुटुंबीयांनी नगरसेविका प्रियंका माने यांच्याशी संपर्क साधून आपली अडचण सांगितली. मृतदेह जिल्हा शासकीय रुग्णालयात नेण्याचा सल्ला काहींनी दिला. मात्र, मृतदेह घेऊन जाण्यास खासगी रुग्णवाहिका चालक नकार देत होते. अखेर नगरसेविका माने यांनी महापालिकेची रुग्णवाहिका उपलब्ध करून दिली. महापालिकेच्या रुग्णवाहिकेतून मृतदेह जिल्हा शासकीय रुग्णालयात आणण्यात आला. येथे तातडीने सर्व शासकीय काम पूर्ण होऊन अंत्यविधी होईल, असे शर्मा कुटुंबीयांना वाटत असताना येथेही अडचणी आल्या. जिल्हा रुग्णालयात पोलिस पंचनामा अथवा डॉक्‍टरांकडून प्रमाणपत्राची मागणी करण्यात आली. दोन्ही गोष्टी शर्मा कुटुंबीयांकडे नसल्यामुळे मृतदेह जिल्हा रुग्णालयात घेण्यात आला नाही. त्यामुळे रुग्णावाहिका रुग्णालयाबाहेरच उभी ठेवण्यात आली. 

हेही वाचा > कोरोनाशी झुंज अपयशी.. मुख्याध्यापकांच्या मृत्यूने खळबळ

अखेर धनंजय माने यांनी पंचवटी पोलिस ठाण्याचे वरिष्ठ पोलिस निरीक्षक अशोक भगत यांच्याशी संपर्क साधत घडलेला सर्व प्रकार सांगितला. श्री. भगत यांनी जिल्हा रुग्णालयातील डॉक्‍टरांशी संपर्क साधून पोलिस पंचनामा देण्याची व्यवस्था केली. सकाळी साडेअकराच्या सुमारास मृतदेह नेण्यात आला होता. तो दुपारी साडेचारला जिल्हा रुग्णालयात घेण्यात आला. इतका वेळ मृतदेहाची हेळसांड झाल्याने शर्मा कुटुंबीयांनी तीव्र नाराजी व्यक्त केली.  

हेही वाचा > VIDEO : "मी अंध असूनही त्यावर मात करू शकली..मग तुम्ही का नाही?"