दिंडोरी (जि. नाशिक) : तालुक्यातील लखमापूर फाटा परिसरात असलेल्या औद्योगिक वसाहतीत आर.सी.फर्टिलायझर कंपनीच्या वायू प्रदूषणामुळे (Air Polution) तालुक्यातील परमोरी, ओझरखेड, अवनखेड परिसरात मोठ्या प्रमाणात प्रदुषणचा प्रादुर्भाव मोठ्या प्रमाणात होत असल्याने या परिसरातील शेतकरी त्रस्त झाले आहेत. या बाबत योग्य निर्णय न घेतल्यास या परिसरातील शेतकरी तीव्र आंदोलन छेडण्याचा इशारा दिला आहे.

मंत्र्यांकडे मांडल्या व्यथा पण त्याचाही उपयोग नाही

याबाबत परिसरातील शेतकऱ्यांनी पत्रकार परिषद घेऊन आपल्या व्यथा मांडल्या आहेत. या परिसरातील कंपनीचे धुरांडे उंच करणे गरजेचे आहे. त्यामूळे या परिसरात प्रदुषण वाढणार नाही याची काळजी घेणे गरजेचे आहे.
तालुक्यातील ओझरखेड, परमोरी, वरखेडा, अवनखेड आदी परिसरात या कंपनीच्या प्रदुषणामुळे शेतात असलेल्या विविध पिकांचे दरवर्षी मोठ्या प्रमाणात नुकसान होत आहे; पण याकडे कोणीही लक्ष देत नाही. प्रदुषण रोखण्यासाठी कायम स्वरुपी उपाययोजना करण्याची गरज आहे. याबाबत येथील प्रांत अधिकारी, तहसिलदार, कृषी अधिकारी, प्रदूषण नियंत्रण मंडळ आदींना निवेदन देण्यात आले आहे. तसेच विधानसभा उपाध्यक्ष नरहरी झिरवाळ, पर्यावरण मंत्री आदित्य ठाकरे, पर्यावरण राज्यमंत्री संजय बनसोडे यांच्या भेटी घेऊन व्यथा मांडली परंतु त्याचाही काही उपयोग झाला नाही.

प्रदुषणामुळे शेतीचे मोठे नुकसान

गेल्या पंधरा वर्षांपासून या परिसरातील शेतकरी त्रस्त झाला असून शेती उत्पादनात मोठ्या प्रमाणात घट झाली आहे. या बाबत नुकतीच कृषी अधिकारी यांनी प्रत्यक्ष शेतात येऊन पाहाणी केली, त्यावेळी सदर कंपनीच्या प्रदुषणामुळे द्राक्ष वेली, भाजीपाला यांची पाने करपत असल्याचे मत त्यांनी व्यक्त केले. त्यावेळी सदर कंपनीच्या प्रदुषणामुळे ही पाने करपत असल्याने संबंधित कंपनीच्या अधिकाऱ्यांना बोलावून पिंकावर प्रदुषण करणा-या घटकांचा बंदोबस्त करावा असे सांगितले. पिकांचे पंचनामे करून सुद्धा काहीही उपयोग झाला नाही.
या परिसरात होणारे प्रदुषण त्वरित रोखावे अन्यथा आंदोलन करण्यात येईल असा इशारा या परिसरातील शेतकरी गंगाधर निखाडे, ज्ञानेश्वर तिडके, शालिमार काळोगे, सदानंद शिवले, वाल्मिक काळोगे, रमेश जाधव, संतोष जमधडे,गोरख बोराडे, विष्णू पाटील, नरेंद्र जाधव, राकेश दिघे, रोशन दिघे, रमेश दिघे, संदीप काळोगे आदी द्राक्ष उत्पादक शेतकऱ्यांनी दिला आहे.