नाशिक : मे संपत आलेला असताना, महिनाभर जिल्‍ह्यात दर दिवशी कोरोनामुळे (corona virus) होणाऱ्या मृत्‍यूंची (corona death) संख्या तीसपेक्षा अधिक राहत होती. रविवारी (ता. ३०) जिल्‍ह्यात २९ मृत्‍यूंची नोंद झाली. महिनाभरात प्रथमच ही संख्या तीसच्‍या आत राहिली. (Less-than-30-deaths-for-first-time-in-May-nashik-marathi-news)

मेमध्ये प्रथमच तीसपेक्षा कमी मृत्‍यू

रविवारी नाशिक महापालिका क्षेत्रात २३४, नाशिक ग्रामीणमध्ये ४०१, मालेगावला ११, तर जिल्‍हाबाहेरील २४ रुग्‍णांचे अहवाल पॉझिटिव्‍ह आले. कोरोनामुक्‍त रुग्‍णांमध्ये नाशिक ग्रामीणमधील ६२८ रुग्‍णांचा समावेश आहे. नाशिक शहरातील साडेतीनशे, मालेगावच्‍या दहा, तर जिल्‍हाबाहेरील १५ रुग्‍णांनी कोरोनावर यशस्‍वीरीत्‍या मात केली. २९ मृतांपैकी सर्वाधिक २० मृत नाशिक ग्रामीणमधील असून, आठ मृत नाशिक महापालिका, तर एक मृत मालेगाव महापालिका हद्दीतील आहे. ग्रामीण भागात नांदगाव व मालेगाव तालुक्‍यातील प्रत्‍येकी चार बाधितांचा कोरोनाने बळी घेतला. कळवणच्‍या तीन, येवला, दिंडोरी व सिन्नर तालुक्‍यातील प्रत्‍येकी दोघा बाधितांचा कोरोनामुळे मृत्‍यू झाला. नाशिक, सटाणा, इगतपुरी येथील प्रत्‍येकी एका बाधिताचा मृत्‍यू झाला. दिवसभरात ६७० पॉझिटिव्‍ह आढळले, तर एक हजार तीन रुग्‍णांनी कोरोनावर मात केली. यातून ॲक्‍टिव्‍ह रुग्‍ण संख्येत ३६२ ने घट झाली. सद्यःस्‍थितीत जिल्‍ह्यात दहा हजार १३३ बाधितांवर उपचार सुरू आहेत.

प्रलंबित अहवालांचा आकडा हजाराच्‍या आत

कोरोनाचा प्रादुर्भाव वाढत असताना, प्रलंबित अहवालांचे प्रमाणही काही प्रमाणात वाढले होते. मात्र, बऱ्याच दिवसांनी रविवारी हा आकडा एक हजाराच्‍या आत राहिला. सायंकाळी उशिरापर्यंत ९४६ अहवाल प्रलंबित होते. यात नाशिक ग्रामीणमधील ४८७, नाशिक शहरातील ३४१, मालेगावच्‍या २० रुग्‍णांना अहवालाची प्रतीक्षा होती. जिल्‍हाभरातील रुग्‍णालये व गृहविलगीकरणात एक हजार ९६ रुग्‍ण दाखल झाले. यात नाशिक महापालिका हद्दीतील ९९७ रुग्‍णांचा समावेश होता. जिल्‍हा रुग्‍णालयात सहा, डॉ. वसंतराव पवार वैद्यकीय महाविद्यालयात पाच रुग्‍ण दाखल झाले. नाशिक ग्रामीणमध्ये ६८, तर मालेगावला २० रुग्‍ण दाखल झाले.