मालेगाव (जि. नाशिक) : चारिञ्याच्या संशयावरुन पत्नीच्या गळ्यावर कोयत्याने वार करुन खून केल्याच्या आरोपावरुन मंगळने (ता. नांदगाव) येथील विजय अहिरे (३५) याला येथील न्यायालयाने जन्मठेपेची शिक्षा सुनावली. जन्मठेपेची शिक्षा सुनावतानाच त्यास दहा हजार रुपये दंड व दंड न भरल्यास एक वर्षाचा कारावास असा आदेश देण्यात आला आहे. जिल्हा अपर सत्र न्यायाधीश डी. डी. कुरुळकर यांनी गुरुवारी (ता.७) हा निकाल दिला.

विजय अहिरे हा पत्नी आशाबाई अहिरे (वय ३०) हिच्या चारिञ्यावर सातत्याने संशय घेत होता. ४ नोव्हेंबर २०१९ ला सकाळी सव्वासहाच्या सुमारास त्याने राहत्या घरी पत्नीवर याच कारणावरुन गळ्यावर कोयत्याने वार करुन तिचा खून केला. या प्रकरणी विजयविरुध्द संजय पवार (रा. डोण-डिंगरगाव, ता. चाळीसगाव) यांच्या तक्रारीवरुन नांदगाव पोलिस ठाण्यात खुनाचा गुन्हा दाखल करण्यात आला. पोलिस निरीक्षक अनिल भवारी यांनी गुन्ह्याचा तपास करुन न्यायालयात दोषारोपपत्र दाखल केले. सरकार पक्षातर्फे ॲडव्होकेट अशोक पगारे यांनी सात साक्षीदार तपासले. खुनाचा गुन्हा सिध्द झाल्याने आरोपी विजयला जन्मठेपेची शिक्षा सुनावण्यात आली. न्यायालयात खटल्याची सर्व माहिती व कागदपत्र यासाठी सागर जगताप यांनी ॲडव्होकेट पगारे यांना सहकार्य केले. त्यांना उपअधिक्षक समरसिंह साळवे व पोलिस निरीक्षक रामेश्‍वर गाढे यांचे मार्गदर्शन लाभले. या खटल्याच्या निकालाकडे अनेकांचे लक्ष लागून होते.