नाशिक : लोकसभा निवडणुकीच्या पार्श्वभूमीवर सुधारित मतदार यादी ५ जानेवारी २०२४ ऐवजी २२ जानेवारीला प्रसिद्ध करण्याचा निर्णय केंद्रीय निवडणूक आयोगाने घेतला आहे.

त्यामुळे जिल्ह्यातील मतदारांच्या संख्येत वाढ होण्यास या मुदतीचा फायदा होईल. (Loksabha Election Publication of new voter list on January 22 nashik)

निवडणूक शाखेतर्फे मागील दोन महिन्यांपासून जिल्ह्यातील १५ विधानसभा मतदारसंघात नवमतदारांच्या नोंदणी केली जात आहे. मतदार यादीत समाविष्ट नावांमधील दुरुस्ती व मतदार यादीत नाव नसेल तर त्यांच्यापर्यंत पोहोचण्याचे प्रयत्न केले जात आहेत.

आयोगाच्या निर्देशानुसार पाच जानेवारी रोजी एकाच वेळी जिल्ह्यातील १५ मतदारसंघाची अंतिम मतदार यादी प्रसिद्धी करण्यात येणार होती. परंतु, आयोगाने नव्याने आदेश काढत यादीच्या प्रसिद्धीला मुदतवाढ दिली आहे.

नवीन आदेशानुसार १२ जानेवारीपर्यंत मतदार यादीवरील दावे आणि हरकती निकाली काढता येणार आहेत. तर १७ तारखेला मतदार यादीची तपासणी व छपाई केली जाईल. तसेच २२ जानेवारीला अंतिम मतदार यादींची प्रसिद्धी करायची आहे. त्यामुळे मतदार नोंदणीसाठी निवडणूक शाखेला पंधरा दिवसांचा अधिक कालावधी मिळणार आहे.