प्रतिक जोशी : सकाळ वृत्तसेवा
नाशिक : पेट्रोल, डिझेलचे गगनाला भिडलेले भाव, यामुळे नागरिकांना वाहने चालविणे कठीण होऊन बसले आणि अशातच शहरात सीएनजी (CNG) गॅसचे पंप सुरू झाले. मात्र, त्यांची संख्या अल्प असल्याने सीएनजी भरण्यासाठी पंपाबाहेर रांगेमध्ये नागरिकांना तासनतास उभे राहावे लागते. शहरातील नागरिकांना होणाऱ्या या असुविधेतून शहरात एक नवीन रोजगाराला चालना मिळाली आहे.

रांगेच्या समस्येतून नव्या रोजगाराचा जन्म

शहरात सीएनजी वाहनांची संख्या वाढली त्यामानाने सीएनजी पंपांची संख्या मात्र पूरक नाही. त्याचबरोबर सीएनजी भरण्याच्या प्रक्रियेलादेखील बराच वेळ लागतो आणि त्यामुळेच शहरातील सीएनजी पंपाबाहेर लांबच लांब रांगा लागतात. अशातच कोरोनामुळे रोजगाराच्या नवनवीन संधी शोधणाऱ्या वर्गाने या समस्येचा उपयोग करत नागरिकांच्या गाडीत सीएनजी भरून आणण्याचा नवीन व्यवसाय सुरू केला आहे.

असा चालतो व्यवसाय

ज्यांच्याकडे सीएनजीचे वाहन आहे, परंतु गर्दीत सीएनजी भरण्यास वेळ नाही अशा नागरिकांना शहरातील काही चालक वर्ग गाडीत सीएनजी भरून आणून देतात. अनेकदा गाडीत सीएनजी भरून देता का, अशी मागणी मालकांकडून होते, तर काहीवेळा चालक स्वतः ग्राहकाच्या शोधात असतात. हे चालक गाडी ताब्यात घेऊन रात्री सीएनजी पंपावर रांगेत सात ते आठ तास प्रतिक्षा करून सीएनजी भरतात. त्यानंतर गाडी पुन्हा मालकांच्या स्वाधीन करतात. एका गाडीत सीएनजी भरून आणण्यासाठी तीनशे ते पाचशे रुपयांपर्यंत आकारणी केली जाते. साधारण एक चालक दिवसभरातून एक किंवा त्यापेक्षा अधिक गाड्यांमध्ये सीएनजी भरून चांगला नफा कमावतात. समस्येतून रोजगाराचा झालेला हा जन्म सध्या नाशिकमध्ये ट्रेंडीग टॉपिक म्हणून चर्चेत आहे.

''आधी बदली चालक म्हणून काम करीत. त्यासाठी बाहेरगावी प्रवास करावा लागत होता, परंतु आता शहरात सीएनजी भरून आणण्याचे काम मिळत असल्याने शहरातल्या शहरात कमी मेहनतीत चांगला रोजगार मिळतो आहे.'' - हर्षल दुशिंग, वाहनचालक

''ज्या नागरिकांना रांगेत उभे राहून सीएनजी भरण्यास वेळ नाही, असे लोक आम्हाला फोन करतात आणि सीएनजी भरून आणण्याची विनंती करतात. काम कुठलीही करायचंच आहे, आणि यातूनही चांगले पैसे मिळतात. त्यामुळे आम्ही आनंदाने हे काम करतो. आमच्यासाठी हा नवीन रोजगार आहे.'' - किशोर जोशी, चालक

''टूर्स ॲन्ड ट्रॅव्हल्स कंपनी चालवताना ग्राहकांच्या येणाऱ्या प्रत्येक गरजेला सहकार्य करणे आमचे काम आहे. सीएनजी भरायचा आहे, त्यासाठी चालक उपलब्ध करून द्या अशी कोणी विनंती केल्यास त्यांना जरूर मदत करतो. यातून चालकाला ३०० ते ५०० रुपयांपर्यंत पैसे मिळतात.'' - नितीन बांडे - संचालक, पुष्पांजली टूर्स ॲन्ड ट्रॅव्हल्स