Nashik News : प्रेमविवाह करायचा असेल, तर आई-वडिलांची परवानगी घेणे आवश्यक आहे. त्याशिवाय नोंदणी कार्यालयानेही परवानगी देऊ नये, असा ठराव सायखेडा ग्रामपंचायतीने केला आहे.

प्रेमविवाहात अट टाकणारी आणि त्यासंबंधी ठराव पारित करणारी सायखेडा ग्रामपंचायत बहुधा राज्यातील पहिली ग्रामपंचायत आहे. माजी सरपंच भाऊसाहेब कातकाडे यांनी याबाबत पंचायतीला पत्र दिले होते. त्यावर ग्रामसभा घेऊन हा निर्णय घेण्यात आला. (Love marriage requires parental permission Resolution of Saykheda Gram Panchayat nashik)

हेही वाचा : Credit Card फसवणूक....काय घ्याल काळजी?

या ठरावानुसार आई-वडिलांच्या परवानगीचे पत्र असेल, तरच विवाहाची नोंद ग्रामपंचायती दप्तरी करण्यात येईल. त्यांनाच विवाह केल्याचा दाखला मिळेल, असा ठराव ग्रामसभेत करण्यात आला.

या ठरावाची प्रत तहसीलदार, जिल्हाधिकाऱ्यांना देण्यात येणार आहे. आदर्श कुटुंबपद्धती अमलात यावी, यासाठी आता सरपंच गणेश कातकाडे, सुधीर शिंदे यांच्यासह लोकप्रतिनिधी प्रयत्न करणार आहेत. मुख्यमंत्र्यांसह संबंधित मंत्री, अधिकाऱ्यांचीही भेट घेऊन त्यांना साकडे घालणार आहे. या ठरावाची सध्या सोशल मीडियावर जोरदार चर्चा सुरू आहे.

"प्रेमविवाह करताना पालकांची परवानगी असणे कायदेशीरदृष्ट्या अनिवार्य नाही. प्रत्येक सज्ञान व्यक्तीला त्यांनी निवडलेल्या व्यक्तीशी लग्न करण्याचा अधिकार आहे. मग ती व्यक्ती कोणत्याही जाती धर्मातील असली, तरी तसा अधिकार आपले संविधान प्रत्येक व्यक्तीला देते. सायखेडा ग्रामपंचायतीने प्रेमविवाह करण्यासाठी आई-वडिलांची परवानगी अनिवार्य असण्याचा ठराव पूर्णपणे घटनाबाह्य आहे."-के. अभिजित, राइट टू लव्ह