सायगाव (जि. नाशिक) : येवले तालुक्यातील उत्तर- पूर्व भागातील सायगाव परिसरात कपाशीवर चार वर्षांपासून सतत बोंडअळीचा प्रादुर्भाव होत असल्याने दर वर्षी क्षेत्र कमी होत आहे. या वर्षी तर विक्रमी दर मिळत असूनही जास्त पाऊस आणि बोंडअळीने मोठे नुकसान केल्याने हातात फारसे काही पडणार नसल्याने शेतकऱ्यांना आता हे पीक नको म्हणण्याची वेळ आली आहे.

बीजी-३ या तंत्रज्ञानाच्या बियाण्याला परवानगी देणे गरजेचे

एकेकाळी या दुष्काळी भागात कपाशीला अनेक शेतकऱ्यांनी प्राधान्य दिल्याने क्षेत्रही वाढले, आर्थिक आधारही मिळाला; पण बोंडअळीचे संकट आल्यापासून उत्पादन कमी होत आहे. इतर सोयाबीन, मका पिकाच्या तुलनेत उत्पादनखर्चही जास्त येत आहे. या वर्षीही अतिपाऊस आणि बोंडअळीने या पिकांची वाट लागली. अनेकदा सहा वेळा वेचणी होते. यंदा तर दोन वेचणीतच शेत रिकामे करावे लागले. उत्पादनखर्च एकरी पंचवीस हजारांच्या पुढे गेला असताना विक्रमी सरासरी आठ हजार रुपयांचा दर मिळूनही उत्पादनखर्च आणि मिळालेले उत्पादन पाहता विक्रमी दर मिळूनही हातात फाससे काही पडणार नसल्याने हे पीक आता नकोसे झाले आहे. बीजी-२ या तंत्रज्ञानातून औषध फवारणी करूनही बोंडअळीचा प्रादुर्भाव कमी होत नसल्याने पुढे केंद्र शासनाने बीजी-३ या तंत्रज्ञानाच्या बियाण्याला परवानगी देणे गरजेचे आहे अन्यथा हे पीक या भागातून नामशेष होण्याच्या मार्गावर आहे.

''पांढऱ्या सोन्याला विक्रमी दर मिळत आहे; पण बोंडअळीने उत्पादन इतके कमी झाले झाले आहे, की उत्पादनखर्चही निघणे ही मुश्कील झाले आहे. दरवर्षीच तोटा होत असल्याने हे पीक आता नको झाले आहे. शासनाने बीजी- ३ या तंत्रज्ञानाला परवानगी द्यावी.'' - दिलीप जेजुरकर, शेतकरी सायगाव