मालेगाव : शहरात कुत्ता गोली (अल्प्राझोलम), गांजा विक्री सुरू होती. पाठोपाठ चरस विक्री सुरू असल्याचेही पोलिसांना निदर्शनास आले. यानंतर नाशिक परिक्षेत्राचे पोलिस उपमहानिरीक्षक बी. जी. शेखर यांनी त्यांच्या विशेष पथकास मालेगाव परिसरात गस्ती घालण्याचे व चरस विक्री करणाऱ्या संशयितांची माहिती काढण्याचे आदेश दिले. उपमहानिरीक्षकांच्या पथकाने गस्तीवर असताना तिघा संशयितांना अटक करून सुमारे दीड लाखाचे चरस, एक दुचाकी असा सुमारे पावणेदोन लाखांचा ऐवज जप्त केला. बुधवारी (ता. २०) रात्री ही कारवाई करण्यात आली.

शहरातील जुन्या महामार्गावरील नॅशनल पेट्रोलपंपाजवळ काही व्यक्ती चरस (अमली पदार्थ) विक्री करण्याच्या उद्देशाने येणार असल्याची माहिती गस्ती पथकास मिळाली. पथकाने स्कूटरवरील (एमएच ४१ एएफ ९३४६) तिघे संशयित पंपानजीक आले असताना छापा टाकून त्यांच्याजवळून सुमारे एक लाख ४४ हजार ३०० रुपयांचे ४८१ ग्रॅम चरस, ३० हजारांची स्कूटर, ५०० रुपयांचा मोबाईल असा सुमारे एक लाख ७४ हजार ८०० रुपयांचा ऐवज मिळून आला.

पोलिसांनी चरस व सर्व वस्तू जप्त करीत पंचनामा केला. या प्रकरणी मोहंमद सईद फारुख कुरेशी (५३, रा. अख्तराबाद), रफिक मोहंमद याकूब (३२, कुंभारवाडा), मोहंमद अमीन समीउल्ला अन्सारी (४०, रा. अख्तराबाद, तिघे रा. मालेगाव) यांना अटक केली. विशेष पथकाने तिघा संशयितांना रमजानपुरा पोलिसांच्या ताब्यात दिले. रमजानपुरा पोलिस ठाण्यात तिघा संशयितांविरुद्ध अमली पदार्थ विरोधी कायद्यान्वये गुन्हा दाखल झाला.