नाशिक : सातपूर परिसरात श्रमिकनगरमध्ये महिलेची ५८ हजारांचे सोन्याचे मंगळसूत्र, तर दुसऱ्या घटनेत आयटीआय सिग्नल येथील पोस्ट ऑफिस समोरून पायी जाणाऱ्या महिलेचे ४० हजारांचे सोन्याचे मंगळसूत्र दुचाकीवरून आलेल्या भामट्याने खेचून नेल्याचा प्रकार घडला. याप्रकरणी सातपूर पोलिसात गुन्हे दाखल आहेत. (Mangalsutra snatching of women in Satpur area nashik Crime Latest Marathi News)

पहिल्या घटनेत अर्चना रवींद्र चांदोड (रा. शिवशंकर राज अपार्टमेंट, श्रमिकनगर, सातपूर) यांच्या फिर्यादीनुसार, त्या गेल्या २३ ऑगस्टला सायंकाळी पावणेसहाच्या सुमारास सातपूरमधील कडेपठारच्या कुमावत बिल्डिंग समोरून दळण दळण्यासाठी गिरणीकडे पायी जात होत्या. त्या वेळी समोरून दुचाकीवरून आलेल्या संशयिताने गळ्यातील ५८ हजार रुपयांचे सोन्याचे मंगळसूत्र खेचून नेले.

तर दुसऱ्या घटनेत अंजना अजित राजपूत (रा. नाईस संकुल, एमआयडीसी सातपूर) यांच्या फिर्यादीनुसार, त्या गेल्या २२ जुलैला सकाळी साडेअकराच्या सुमारास आयटीआय सिग्नल परिसरातील पोस्ट ऑफिससमोरून घराकडे पायी जात होत्या. त्या वेळी समोरून दुचाकीवरून आलेल्या संशयिताने त्यांच्या गळ्यातील ४० हजार रुपयांची सोन्याचे मंगळसूत्र खेचून पोबारा केला.