नाशिक : (म्हसरूळ) जिल्हाभरातून बाजार समितीत शेतकरी शेतमाल घेऊन येतात. रात्रीच्या वेळी येणाऱ्या शेतकऱ्यांच्या अडचणी लक्षात घेऊन त्यांच्यासाठी चोवीस तास बाजार समितीचे आवार खुले ठेवण्यात येणार आहे, असे सभापती देवीदास पिंगळे यांनी सांगितले. 

रस्ते आणि मार्केटचे काम त्वरित पूर्ण करण्यात येणार

नाशिक कृषी उत्पन्न बाजार समितीचे नूतन सभापती देवीदास पिंगळे यांनी गुरुवारी (ता. ३) बाजार समिती संचालकांसोबत दिंडोरी रोड व पेठ रोडवरील बाजार समितीची पाहणी केली. शेतकरी, हमाल, मापारी, व्यापारी आदी घटकांशी चर्चा करून त्यांच्या समस्या जाणून घेतल्या. पेठ रोडच्या बाजार समितीत होणाऱ्या टोमॅटो मार्केटमध्ये प्रतिसाद वाढला आहे. या मार्केटमध्ये सध्या गाळ असल्याने तो काढण्याचे काम सुरू आहे. येथील रस्ते आणि मार्केटचे काम त्वरित पूर्ण करण्यात येणार असल्याचे पिंगळे यांनी सांगितले. 

तक्रारी असल्यास तत्काळ संपर्क करण्याचे आवाहन 

बाजार समितीतील रस्त्याची झालेली दुरवस्था, प्रसाधनगृह, पिण्याच्या पाण्याची व्यवस्था, पथदीप यांच्या समस्या जाणून घेतल्या. बाजार समितीतील घटकांशी चर्चा करून बाजार समिती प्रशासनाला तत्काळ समस्या मार्गी लावण्याबाबत सूचना केल्या. तक्रारी असल्यास तत्काळ संपर्क करण्याचे आवाहन केले. या पाहणी दौऱ्यात उपसभापती युवराज कोठुळे, संचालक संजय तुंगार, संपत सकाळे, विश्वास नागरे, दिलीप थेटे, विनायक माळेकर आदी सहभागी झाले होते. 

हेही वाचा > धक्कादायक! सासरच्यांनीच लेकीचा घातपात करुन विहिरीत फेकल्याचा पित्याचा आरोप; परिसरात खळबळ

शेतकरी हिताचे निर्णय घेण्यसाठी पाहणी केली. यातून शेतकरी बांधवांना येणाऱ्या अडचणी समोर आल्या. त्या अनुषंगाने दिंडोरी रोड मुख्य बाजार आवार व शरदचंद्रजी मार्केट यार्ड येथे असलेल्या समस्यांचे निवारण करणार आहे. पेठ रोड येथे होत असलेल्या बाजार समितीच्या आवारात टोमॅटोची आवक वाढली आहे. त्यांना चांगले दर मिळतील, याची शेतकऱ्यांनी नोंद घ्यावी. - देवीदास पिंगळे, सभापती, बाजार समिती 

हेही वाचा > गाई चारायला गेलेल्या प्रशांतच्या नशिबी असे दुर्दैव; घटनेनंतर गावात भयाण शांतता

संपादन - किशोरी वाघ