वणी (जि. नाशिक) : खेडगाव (ता. दिंडोरी) येथील विवाहितेने शुल्लक कारणाहून पती व सासूच्या सततच्या शिविगाळ व शारीरिक व मानसिक जाचाला कंटाळून विहिरीत उडी घेत आत्महत्या केली. याबाबत वणी पोलिसांत पती व सासूविरोधात आत्महत्येस प्रवृत्त केल्याचा गुन्हा दाखल करण्यात आला आहे.

खेडगाव येथील दीपाली प्रभाकर गायकवाड ( २९) वर्षे हीचे सहा वर्षांपूर्वी प्रभाकर तुकाराम गायकवाड (३३, रा. खेडगाव) यांच्याशी लग्न झाले होते. सहा वर्षानंतर दीपालीस क्षुल्लक कारणावरुन शिविगाळ, मारहाण करुन तिचा शारीरीक, मानसिक छळ पती प्रभाकर व सासू विमलबाई तुकाराम गायकवाड करीत होते. त्यांच्या सततच्या शारीरीक व मानसिक जाचास कंटाळून दीपालीने मंगळवारी (ता.१४) दुपारी दोनच्या पूर्वी खेडगाव येथील राहत्या घराजवळील विहिरीत उडी घेवून आत्महत्या केली. याबाबत दीपालीचे भाऊ रविकांत बाळू गुंबाडे (२७, रा. पालखेड बंधारा, ता. दिंडोरी) यांच्या फिर्यादीवरुन वणी पोलिसांत पती प्रभाकर गायकवाड, सासू विमलबाई गायकवाड यांच्या विरोधात आत्महत्येस प्रवृत्त केल्याचा गुन्हा दाखल करण्यात आला आहे. पोलिस उपनिरीक्षक रतन पगार व रघुनाथ भरसट तपास करीत आहे.