Nashik Winter Update: यंदाच्‍या हिवाळी हंगामात एकदाही नाशिकचे किमान तापमान १२ अंश सेल्सिअसपेक्षा खालावलेले नाही. असे असले तरी दिवसभर ढगाळ वातावरण राहात असल्‍याने वातावरणात कमालीचा गारवा जाणतो आहे.

परिणामी प्रमुख शहरांच्‍या तुलनेत बुधवारी (ता.२०) नाशिकचे कमाल तापमान राज्‍यात निच्चांकी राहिले. मालेगावचे २४.६ अंश तर नाशिकचे कमाल तापमान २४.७ अंश सेल्सिअस होते. (Maximum temperature of Nashik is lowest in state news)

अवघ्या काही दिवसांपूर्वीपर्यंत नाशिकचे कमाल तापमान ३० अंश सेल्सिअसच्या सुमारास राहात होते. त्‍यामुळे दिवसाच्‍या वेळी काही प्रमाणात सामान्‍य वातावरण अनुभवायला येत होते. परंतु काही दिवसांपासून वातावरणात गारवा निर्माण झालेला असताना पाऱ्यात सातत्‍याने घसरण होते आहे.

सद्यःस्‍थितीत किमान तापमान १४ अंश सेल्सिअसच्या जवळ राहाते आहे. मात्र दुसरीकडे कमाल तापमानात सातत्‍याने घसरण सुरु आहे.

बुधवारी (ता.२०) नाशिकचे कमाल तापमान राज्‍यात निच्चांकी राहिले. दुसरीकडे किमान तापमान मात्र इतर प्रमुख शहरांच्‍या तुलनेत अधिक राहात आहे.

वाऱ्यामुळे थंडीची अनुभूती

सध्या पाऱ्यात विशेष घसरण बघायला मिळत नसली तरी ताशी १० किलोमीटरपेक्षा अधिक वेगाने वारा वाहतो आहे. त्‍यामुळे थंडीची तीव्रता अधिक जाणवत असल्‍याचा अनुभव नागरिकांना येतो आहे. येत्‍या दिवसांत पारा घसरून थंडी अधिकच वाढण्याची शक्‍यता आहे.