Nashik Onion Trader : केंद्रीय मंत्री पीयूष गोयल यांच्याशी चर्चा निष्फळ ठरल्यावर आता पुढील भूमिका ठरविण्यासाठी कांदा व्यापाऱ्यांनी शुक्रवारी (ता. २९) जिल्ह्यातील व्यापाऱ्यांची बैठक बोलावली आहे. (Meeting of onion traders tomorrow nashik news)

बैठकीचे ठिकाण अद्याप निश्चित झालेले नसले, तरी नाशिकमध्ये ही बैठक होण्याची शक्यता व्यापारी असोसिएशनचे अध्यक्ष खंडू देवरे यांनी व्यक्त केली. कांद्यावरील ४० टक्के निर्यातशुल्क हटविण्यासह इतर मागण्यांसाठी जिल्ह्यातील कांदा व्यापाऱ्यांनी २० सप्टेंबरपासून कांदा लिलाव बंद ठेवले आहेत. त्यामुळे जिल्ह्यातील २०० कोटी रुपयांचे व्यवहार ठप्प झाले.

याविषयी तोडगा काढण्यासाठी उपमुख्यमंत्री अजित पवार यांनी मंगळवारी (ता. २६) मुंबईत नाशिक जिल्ह्यातील कांदा व्यापारी व कृषी उत्पन्न बाजार समितीच्या पदाधिकाऱ्यांबरोबर बैठक घेतली.

यानंतर केंद्रीय वाणिज्यमंत्री पीयूष गोयल यांच्याबरोबर बैठक घेतली. पण, व्यापाऱ्यांनी आपला बंद मागे घेतला नाही.

त्यामुळे जिल्ह्यातील १७ कृषी उत्पन्न बाजार समित्यांमधील लिलाव अजूनही बंद आहेत. याविषयी पुढील निर्णय घेण्यासाठी शुक्रवारी व्यापाऱ्यांनी बैठक बोलावली आहे. बैठकीत काय निर्णय होतो, याकडे संपूर्ण जिल्ह्याचे लक्ष लागून आहे.