नाशिक : पर्यटन तथा पर्यावरणमंत्री आदित्‍य ठाकरे नाशिक दौऱ्यावर येत आहेत. गुरुवारी (ता. २७) रात्री उशिरा ते नाशिकला दाखल होणार आहेत. शुक्रवारी (ता. २८) पाहणी दौऱ्यासह आढावा बैठकी घेणार आहेत. ते उंटवाडी परिसरातील म्‍हसोबा मंदिराला भेट देऊन दोनशे वर्षे जुन्‍या वटवृक्षाची पाहणी करणार आहेत.?(Minister Aditya Thackeray News)

जिल्‍हा प्रशासनाला मंत्री ठाकरे यांचा दौरा प्राप्त झाला आहे. त्‍यानुसार गुरुवारी (ता. २७) मंत्री आदित्‍य ठाकरे औरंगाबाद येथून वाहनाने नाशिकमध्ये दाखल होतील. रात्री उशिरा नाशिकला आल्‍यानंतर ते मुक्‍कामी असतील. शुक्रवारी (ता. २८) सकाळी ते महाराष्ट्र पर्यटन विकास महामंडळाच्‍या बोटक्‍लबला भेट देतील. दुपारी बाराला शेंद्रेपाडा व सावरपाडा येथील आदिवासी पाड्यांना ते भेट देणार आहेत.

दुपारी साडेतीनच्‍या सुमारास सिटी सेंटर मॉल परिसरातील म्‍हसोबा महाराज मंदिराला भेट देत दोनशे वर्षे जुन्‍या वटवृक्षाची पाहणी करतील. नंतर विभागीय आयुक्‍त कार्यालयात विविध विषयांवर बैठका घेणार आहेत. नाशिक जिल्‍ह्यातील पर्यटनविषयक आढावा ते घेतील. नाशिक विभागातील ‘माझी वसुंधरा अभियाना’ची आढावा बैठक होईल. सायंकाळी पावणेसहाच्‍या सुमारास ते माध्यम प्रतिनिधींशी संवाद साधणार आहेत. नंतर सर्व कार्यक्रम आटोपून ते रात्री मुंबईकडे रवाना होतील.