नाशिक : गेल्या 25 दिवसांपासून शहरात सुरू असलेल्या लॉकडाउनमुळे हातावर पोट असलेले मजूर, कारखाने व सर्वच व्यवसायांना फटका बसला, शेतीपूरक दुग्धव्यवसाय ही त्यातून सुटला नाही. हॉटेल, चहाचे ठेले व मिठाईची दुकाने बंद असल्याने दुधाला मागणी घटली. त्यात जीवनावश्‍यक वस्तूंच्या विक्रीवर रविवार (ता. 12)पासून वेळेचे निर्बंध आल्याने आधीच उल्हास त्यात फाल्गुन मास अशी अवस्था दूध विक्रेत्यांची झाली; परंतु आमदार ऍड. राहुल ढिकले यांनी पोलिस आयुक्तांकडे दूध विक्रेत्यांची व्यथा मांडल्यानंतर तातडीने वेळेत बदल करण्यात आला. 

पोलिस आयुक्तांकडून दिलासा 

कोरोनाच्या संसर्गामुळे लॉकडाउन जाहीर करण्यात आले असले तरी जीवनावश्‍यक वस्तूंच्या विक्रीला परवानगी आहे; परंतु नागरिकांची गर्दी वाढत असल्याने जिल्हाधिकारी, पोलिस व महापालिकेने संयुक्तपणे बैठक घेऊन रविवारपासून दहा ते चार या कालावधीतच दुकाने सुरू ठेवण्याचा निर्णय घेतला. या निर्णयाची काटेकोर अंमलबजावणी सुरू झाल्याने शहर व परिसरातील दूध विक्रेत्यांकडून तीव्र प्रतिक्रिया उमटल्या. याची दखल घेत नाशिक पूर्वचे आमदार ऍड. राहुल ढिकले यांनी पोलिस आयुक्त विश्‍वास नांगरे-पाटील यांची भेट घेत व्यथा मांडली. त्यानंतर मंगळवारी (ता. 14) दुपारी दूध विक्रेत्यांसाठी वेळेचे बंधन शिथिल करण्याचा निर्णय घेतला. 

असा आहे नवा बदल
 
सकाळी सहा ते साडेसात व दुपारी चार ते सायंकाळी साडेपाच या वेळेत दूध विक्री करता येणार आहे. दूध विक्रीसाठी प्रत्येक विक्रेत्याला विशेष शाखेतून पास घ्यावा लागणार आहे. स्थानिक पोलिस ठाण्यामध्ये विक्रेत्यांचे तपशील, नाव, वाहनाचा क्रमांक, फोटो व विक्रीचे स्थान द्यावे लागेल. पोलिस ठाणे प्रभारी व विक्रेत्याने जागेसंदर्भात निर्णय घ्यावा. एका जागेवर फक्त एकाच विक्रेत्याला विक्रीची परवानगी मिळेल. पोलिसांच्या कोरोना सेलमार्फत पास दिले जातील. 

दुधाची मागणी घटली 

शहरात मोठ्या प्रमाणात दुग्धव्यवसाय आहे. शहरात 37 मोठे गोठे, तर शहराच्या ग्रामीण भागात शेतीपूरक व्यवसाय म्हणून दुग्धव्यवसाय केला जातो. नाशिकसह मुंबई, ठाणे शहरात दुधाचा पुरवठा केला जातो. विशेषतः हॉटेल, मिठाईची दुकाने, चहाच्या ठेल्यांवर दुधाचा पुरवठा केला जातो. लॉकडाउनमुळे हॉटेल, चहाची दुकाने बंद असल्याने फक्त घरगुती दुधाचा पुरवठा केला जातो. मागणी घटल्याने दुधाचे दरही 40 रुपये प्रतिलिटरपर्यंत घसरले आहेत. वाढत्या तापमानात दूध दीर्घकाळ टिकू शकत नाही. त्यामुळे दहा ते चार ही वेळ सोयीस्कर नसल्याने दुधाचे नुकसान होण्याच्या तक्रारी प्राप्त होत होत्या. शेती व्यवसाय ठप्प होण्यामागे दुधाला घटलेली मागणीदेखील कारणीभूत आहे. साधारण दीडशे दूध विक्रेत्यांचे दररोज पाच ते दहा हजार रुपयांचे नुकसान होत आहे.

हेही वाचा > VIDEO : तुम्हीच सांगा, जगायचं कसं?पोट भरण्यासाठी थोडा वेळ तरी व्यवसाय करू द्या... 

 ठराविक वेळेत दूध विक्री करणे शक्‍य नसल्याच्या तक्रारी आल्यानंतर पोलिस आयुक्तांची भेट घेऊन वेळेत बदल करण्याची मागणी केली होती. बदल केल्याने दूध विक्री करता येणार आहे. - ऍड. राहुल ढिकले, आमदार 

हेही वाचा > लॉकडाऊनमध्ये पोलीसच नशेत तर्रार अन् गाडी स्पीडमध्ये...बघता बघता गाडी थेट पोलीस हवालदारावरच!