नाशिक : काही दिवसात पेट्रोलच्या दरामध्ये (petrol price) भरमसाट वाढ झाली आहे. १०२ रुपये लिटर पेट्रोल असल्याने नागरिकांमध्ये संताप व्यक्त केला जात आहे. या संतापाला वाट मोकळी करून देण्याच्या उद्देशाने पक्षप्रमुख राज ठाकरे (raj thackeray) यांच्या वाढदिवसाचे निमित्त साधून मनसेकडून गांधीगिरी करण्यात आली आहे. (MNS-Sell-​​petrol-at-cheap-rate-nashik-marathi-news)

कोरोना काळात काही अंशी दिलासा

महाराष्ट्र नवनिर्माण सेनेचे (mns) अध्यक्ष राज ठाकरे (Raj thackeray) यांच्या वाढदिवसाचे निमित्त साधून मनसेतर्फे सोमवारी (ता.१४) त्र्यंबक नाका येथील एका पंपावर ५३ रुपये प्रतिलिटर दराने पेट्रोल वितरित करून गांधीगिरी पद्धतीने दरवाढीविरोधात आंदोलन केले. पन्नास रुपये कमी दराने पेट्रोल मिळाल्याने शेकडो नागरिकांनी याचा लाभ घेतल्याचा दावा मनसेकडून करण्यात आला. कोरोनामुळे नागरिकांची आर्थिक परिस्थिती बिघडली आहे. त्यात इंधन दरवाढ सातत्याने होत असल्याने महागाईचा भडका उडाला आहे. सर्वसामान्य नागरिकांना काही अंशाने का होईना दिलासा देण्याच्या उद्देशाने पेट्रोल वितरित केल्याचे जिल्हाध्यक्ष दातीर व शहराध्यक्ष पवार यांनी माहिती दिली.

यावेळी जिल्हाध्यक्ष दिलीप दातीर, शहराध्यक्ष अंकुश पवार, मनविसेचे जिल्हाध्यक्ष श्‍याम गोहाड, शहराध्यक्ष संदेश जगताप, शारीरिक सेनेचे शहराध्यक्ष विजय आगळे, रोजगार व स्वयंरोजगार विभागाचे शहराध्यक्ष सिद्धेश सानप, सरचिटणीस पंकज बच्छाव, पंकज दातीर, बबलू ठाकूर आदी या वेळी उपस्थित होते.