नाशिकरोड : बिटको महाविद्यालयात बारावीच्या परीक्षेसाठी बसलेल्या विद्यार्थ्यांनी आपल्या दुचाकी गाडीत मोबाईल ठेवले असता, सात ते आठ मोबाईल अज्ञात चोरट्याने दुचाकी गाडीच्या डिकीतून चोरून नेल्याचा प्रकार गुरुवारी (ता. ७) दुपारी घडला. या प्रकारामुळे खळबळ उडाली आहे. दरम्यान, याप्रकरणी एका विद्यार्थ्याने उपनगर (Upanagr) पोलिस ठाण्यात तक्रार दाखल केली आहे. बिटको महाविद्यालयात गुरुवारी बारावीचा (HSC) मराठी पेपर होता. परीक्षा हॉलमध्ये विद्यार्थ्यांना मोबाईल नेण्यास परवानगी नसल्यामुळे अनेक विद्यार्थ्यांनी आपले मोबाईल दुचाकी गाडीच्या डिकीमध्ये ठेवले होते.

दरम्यान, विद्यार्थी परीक्षा हॉलमध्ये पेपर देत असल्याचा फायदा घेऊन अज्ञात चोरट्यांनी मुख्य प्रवेशद्वाराच्या बाहेर असलेल्या या विद्यार्थ्यांच्या दुचाकी गाडीतून सात ते आठ मोबाईल चोरून नेले. पेपर संपताच विद्यार्थी बाहेर आले, तेव्हा त्यांना मोबाईल चोरी झाल्याचे आढळले. काही विद्यार्थिनींचे ही मोबाईल चोरी गेले असल्याचे समजले. घटनेनंतर विद्यार्थ्यांनी जवळच असलेल्या पोलिस चौकीत जाऊन पोलिसांशी संपर्क साधला व मोबाईल चोरी गेल्याची माहिती दिली.