नाशिक : सध्याच्या लॉकडाउनमुळे खासगी कंपन्यांतील कर्मचारी असो किंवा महाविद्यालय स्तरावरील लेक्‍चर घेण्यासाठी विविध डिजिटल माध्यमांचा उपयोग केला जात आहे. परंतु यापैकी काही ऍप असुरक्षित असल्याने सायबर सुरक्षेचा प्रश्‍न निर्माण झाला आहे. त्यातील एक असलेल्या झूम या व्हिडिओ कॉलिंग ऍपवरील पाच लाख वापरकर्त्यांची माहिती गहाळ झाली आहे. हॅकर्स फोरम, डार्कवेबवर या डेटाची विक्री केली जात असल्याचा धक्‍कादायक प्रकार निदर्शनास आला आहे. 

ऍपच्या सुरक्षिततेचा प्रश्‍न गंभीर

संपूर्ण प्रक्रिया ठप्प झालेली असल्याने एकाएकी विविध ऍपचा वापर वाढल्याचे दिसून आले आहे. यात व्हिडिओ कॉलिंग ऍपचे प्रमाण सर्वाधिक आहे. परंतु या ऍपच्या सुरक्षिततेचा प्रश्‍न अत्यंत गंभीर बनला आहे. आपल्या सोयीसाठी डाउनलोड केलेले हे ऍप खासगी डेटाच्या चोरीचे कारण ठरू पाहत आहे. अशीच एक बातमी सुन्न करणारी आहे. सुमारे पाच लाख 30 हजार झूम अकाउंटवापरकर्त्यांचा डेटा केवळ पंधरा पैसे प्रतिखातेधारक या दराने विक्री केला जात आहे. या माहितीत वापरकर्त्याचा ई-मेल, पासवर्ड, पर्सनल मीटिंग युआरएल व होस्ट की अशा माहितीचा समावेश आहे. लिंक झालेला डेटा अनेक नामांकित कंपन्यांच्या कर्मचाऱ्यांशी निगडित आहे. 

हेही वाचा > कोरोनाच्या भितीने पत्नीला पाठवले माहेरी...स्वत:ला कोेडले घरात! अन् मग...

सावधगिरी महत्त्वाची 

सध्याच्या परिस्थितीत तंत्रज्ञानाचा वापर करताना सावधगिरी बाळगणे महत्त्वाचे आहे; अन्यथा हलगर्जी चांगलीच महागात पडू शकते. त्यासाठी आपण डाउनलोड करत असलेल्या सुरक्षिततेच्या स्तराविषयी खात्री करणे आवश्‍यक आहे. तसेच नियमिपणे पासवर्ड बदलणे व अन्य विविध उपाययोजना करणे आवश्‍यक आहे.  

हेही वाचा > चक्क नामपूर ग्रामीण रुग्णालयच सील करावं लागलं..असं काय घडलं?