नाशिक / घोटी : इगतपुरी तालुक्‍यातील रायांबे येथील नागरिकाला कोरोनाची लागण झाल्याचे समोर आले आहे. ग्रामीण भागातील ही पहिलीच केस असल्याने तालुक्‍यातील प्रशासन खडबडून जागे झाले आहे. यापूर्वी घोटी शहरातील आरोग्य कर्मचारी बाधित असताना मुंबईत खासगी नोकरी करणाऱ्या रायांबे येथील एकाला कोरोना संसर्ग झाल्याचे पुढे आहे आहे. त्यामुळे तालुक्‍यातील दोन्ही रुग्णांचे मुंबई कनेक्‍शन असल्याचे पुढे आले आहे. 

असे आहे कनेक्शन..

तालुक्‍यात आतापर्यंत कोरोनाबाधित रुग्णांची संख्या दोन झाली आहे. रायांबे येथील नागरिक मुंबई येथे खासगी कंपनीत कामाला होता. आठ दिवसांपूर्वी तब्येत ठीक नसल्याने गावी आला होता. कुटुंबीयांनी त्याला नाशिकला खासगी रुग्णालयात उपचारासाठी ठेवले होते. त्याचा कोरोनाचा अहवाल आल्यानंतर त्याला जिल्हा रुग्णालयात उपचारासाठी पाठविण्यात आले. तालुका प्रशासनाला समजताच रायांबे येथे कुटुंबीयांची भेट घेत रुग्णाच्या संपर्कातील 11 नागरिकांचे अहवाल तपासणीसाठी पाठविले आहेत. तालुक्‍यातील दोन्ही रुग्णांचे मुंबई कनेक्‍शन समोर आल्याने, मुंबई कनेक्‍शनचा इगतपुरीत चांगलाच धसका घेतला आहे. तहसीलदार परमेश्‍वर कासुळे, गटविकास अधिकारी किरण जाधव, सहाय्यक गटविकास अधिकारी भरत वेंदे, तालुका आरोग्याधिकारी एम. बी. देशमुख, सहाय्यक पोलिस निरीक्षक जालिंदर पळे यांनी भेट दिली. 

हेही वाचा > कोरोनापेक्षा बदनामीच्या विषाणूशी 'तो' वेदनादायक संघर्ष...पण, आम्ही लढलोच!

संपर्कातील 11 सदस्यांचे नमुने घेतले

मुंबई येथूनच लागण झाल्याचे समोर आल्याने संपर्कातील 11 सदस्यांचे नमुने घेतले आहेत. रुग्णास जिल्हा रुग्णालयात उपचारासाठी पाठविण्यात आले आहे. नागरिकांनी काळजीपूर्वक सामाजिक अंतर राखत, मास्क वापरावे. -एम. बी. देशमुख, तालुका आरोग्याधिकारी, इगतपुरी 

हेही वाचा > 'मी नाही, माझ्यातल्या खेळाडूने केले कोरोनाला क्लिन बोल्ड!'