नाशिक : परतीच्या मुसळधार पावसामुळे गुरुवारी (ता.२६) व शुक्रवारी (ता.२७) जिल्ह्यातील ६३० हेक्टरवरील मका, भात, कांदा या पिकांचे नुकसान झाले आहे. त्याच्या दोन दिवस आधी इगतपुरी आणि नांदगाव तालुक्यातील ३०६ शेतकऱ्यांचे जवळपास ८४ हेक्टर क्षेत्रावरील पिकांचे नुकसान झाले होते. म्हणजे पाच दिवसात जवळपास ७१४ हेक्टर क्षेत्रावरील पिकांचे नुकसान झाले आहे. सप्टेंबरमध्ये मालेगाव, दिंडोरी व सिन्नर या तीन तालुक्यांमध्ये परतीच्या पावसाने हजेरी लावल्याने पिकांचे मोठे नुकसान केले. (714 hectares were destroyed in 5 days in district due to heavy rain )

यात मालेगाव तालुक्यातील एकाच गावात ६७० शेतकऱ्यांच्या मका पिकांचे ५७० हेक्टर क्षेत्रावर नुकसान झाले. २० हेक्टर कांदा पीक वाया गेले. दिंडोरी तालुक्यातील चार गावातील ६ शेतकऱ्यांच्या २.२० हेक्टर भात क्षेत्राचे नुकसान झाले. सिन्नर तालुक्यातही ५ गावांमध्ये ३४ शेतकऱ्यांना या परतीच्या पावसाचा फटका सहन करावा लागला. (latest marathi news)

जिल्ह्यातील काही भागात काढणीसाठी आलेले लाल कांद्याचे पिकामध्ये देखील पाणी साचल्याने पिके खराब होण्याचा धोका आहे. लागवड केलेले कांदे खराब होत असून, येत्या काही महिन्यांत उत्पादन कमी होण्याची शेतकऱ्यांकडून भीती दर्शवली जात आहे. त्याचप्रमाणे काढणीनंतर शेतात उरलेल्या सोयाबीनचेही नुकसान होत असून, काढणी न झालेली पिके पावसाचा जोर कायम राहिल्यास काळी पडण्याचाही धोका आहे.