नाशिक : सातत्याने स्टॉक मार्केट, शेअर ट्रेडिंगच्या नावाखाली जादा परताव्याचे आमिष दाखवून लाखोंचे गंडा घालणार्या सायबर भामट्यांनी आणखी चौघांना सुमारे ९४ लाखांना गंडा घातला आहे. कोटक कंपनीचे बनावट पोर्टलवरून आयपीओ खरेदीस भाग पाडून ही फसवणूक केली आहे. फसवणूक झालेले सेवानिवृत्त व्यक्तीच्या फिर्यादीनुसार, गेल्या महिनाभरात संशयित सायबर भामट्यांनी व्हॉटसॲपच्या माध्यमातून संपर्क साधला होता. ()

त्यावेळी भामट्यांनी कोटक कंपनीशी साम्य असलेल्या कोटक प्रो, सिपकोटक, कोटक सिक्युरिटी लिमीटेड या कंपन्यांच्या नावाचे बनावट पोर्टल तयार केलेले होते. ते त्यांनी विश्वास संपादन करून फिर्यादीला डाऊनलोड करण्यास भाग पाडले. त्यानंतर, त्या बनावट पोर्टलच्या माध्यमातून सायबर भामट्याने विविध कंपन्यांचे आयपीओ खरेदी करण्यासाठी व त्यातून जादा परतावा मिळेल असे आमिष दाखवून गुंतवणूक करण्यास भाग पाडले.

या आमिषांना बळी पडून सेवानिवृत्त फिर्यादीप्रमाणे शहरातील आणखी तिघांना सायबर भामट्यांनी बळी पाडले होते. या चौघांकडून सायबर भामट्यांने मोठमोठ्या रकमा ऑनलाईन गुंतवणूक करण्यास सांगितले. त्यानुसार, चौघांनी गुंतवणूक केली. महिन्याभरातील गुंतवणूकीवरील लाभाची रक्कम पाहून आणखी गुंतवणूक केली. त्यानंतर लाभाची रक्कम काढता येत नसल्याने त्यांनी सायबर भामट्याकडे संपर्क साधला असता, त्यांनी उडवाउडवी केली.

त्यावेळी फसवणूक झाल्याचे लक्षात येताच त्यांनी सायबर पोलिसात धाव घेतली. सायबर भामट्यांनी चौघांची ९३ लाख ८८ हजार ५६० रुपयांचा गंडा घातला. याप्रकरणी अज्ञात सायबर भामट्यांविरोधात नाशिक सायबर पोलिसात गुन्हा दाखल केला असून, वरिष्ठ निरीक्षक सुभाष ढवळे हे तपास करीत आहेत.

''सोशल मीडियावरून शेअर मार्केट, आयपीओ खरेदी करण्याऐवजी तज्ज्ञ शेअर ब्रोकर्सकडून आर्थिक व्यवहार करावा. सोशल मीडियावरून फसवणुकीचीच शक्यता अधिक असून, सायबर भामट्यांपासून सावध राहावे.''- सुभाष ढवळे, वरिष्ठ पोलीस निरीक्षक, सायबर पोलीस ठाणे.