Nashik Accident News : मुंबई-आग्रा महामार्गावरील माणिकखांब शिवारात शनिवारी (ता. २४) भरधाव वेगातील कारवरील नियंत्रण सुटल्याने झालेल्या अपघातात दोन चुलत भावांचा मृत्यू झाल्याची घटना घडली. अपघातग्रस्त कार तीन वेळा पलटी होऊन नाल्यात कोसळली. अनिल निवृत्ती गोवर्धने (वय ३५), सुनील (बाळू) गणेश गोवर्धने (३८, दोघेही रा. सांजेगाव, ता. इगतपुरी, जि. नाशिक) अशी ठार झालेल्या दोन चुलत भावांची नावे आहेत. (Nashik Accident in Manikkhamb marathi news)

पोपट (पप्पू) मुरलीधर गोवर्धने असे जखमीचे नाव आहे. पोलिसांनी दिलेल्या माहितीनुसार, अनिल गोवर्धने, सुनील गोवर्धने व पोपट गोवर्धने हे कारने वाडीवऱ्हे येथून नाशिकच्या दिशेने शनिवारी (ता. २४) रात्री साडेदहाच्या सुमारास येत होते. कार माणिकखांब शिवारात आली असता चालकाचे कारवरील नियंत्रण सुटले. (latest marathi news)

त्यामुळे कार तीन पलट्या घेऊन महामार्गालगतच्या नाल्यात पडली. या भीषण अपघातात तिघे जखमी झाले. जखमींना नरेंद्रचार्य महाराज संस्थानच्या रुग्णवाहिकेमार्फत जिल्हा रुग्णालयात दाखल करण्यात आले.

वैद्यकीय अधिकाऱ्यांनी तपासणी करीत दोघांना मृत घोषित केले. जखमी पोपट गोवर्धने यांच्यावर रुग्णालयात उपचार सुरू आहेत. या घटनेमुळे माणिकखांब गावावर शोककळा पसरली आहे. वाडीवऱ्हे पोलिस ठाण्यात अपघाताची नोंद करण्यात आली आहे.