Nashik News : तब्बल बारा वर्षांपासून अत्याधुनिक जलतरण तलावाचे स्वप्न बघितलेल्या इंदिरानगरवासीयांचे हे स्वप्न रविवार (ता. १०) पूर्णत्वास जात असून आमदार सीमा हिरे यांच्या विकास निधीतून साडेसोळा कोटी रुपये खर्च करून प्रभाग ३० मधील सदिच्छानगर येथील महापालिकेच्या क्रिकेट मैदान भागात या तरण तलावाचे भूमिपूजन करण्यात येणार आहे. सायंकाळी पाच वाजता होणाऱ्या कार्यक्रमासाठी स्वामी श्री नरेंद्राचार्य महाराज यांची विशेष उपस्थिती असणार आहे. (Nashik Indiranagar swimming pool marathi news)

२०१२ च्या सार्वत्रिक मनपा निवडणुकी नंतर पाथर्डी ते नासर्डी भागात अद्ययावत तरण तलाव व्हावा, अशी मागणी सर्वच नगरसेवकांनी लावून धरली. मात्र मोठा निधी आणायचा कुठून या प्रश्नामुळे सातत्याने हा प्रश्न मागे पडत होता. गेल्या पंचवार्षिक निवडणुकीत आमदार हिरे यांनी त्यांच्या जाहीरनाम्यात कोणत्याही परिस्थितीत हा तरण तलाव बांधण्यात येईल, असे आश्वासन दिले होते.

त्याची पूर्तता अखेर त्यांनी केल्याने संपूर्ण इंदिरानगर परिसरात उत्साहाचे वातावरण आहे. ५० मीटर लांब असलेला हा तलाव आंतरराष्ट्रीय स्पर्धांचे मापदंड लक्षात घेऊन बांधला जाणार आहे. त्यामुळे भविष्यात या ठिकाणी केवळ स्थानिकच नव्हे तर राष्ट्रीय स्पर्धादेखील भरवण्याची सोय होणार आहे. (latest marathi news)

सध्या स्वातंत्र्यवीर सावरकर जलतरण तलाव आणि नाशिक रोडच्या बिटको येथील तलावात व्यावसायिक स्पर्धांची सोय आहे. लाखोंची वाढलेली लोकसंख्या, त्यात परिसरात नव्याने पुढे आलेले खेळाडू यांची सातत्याने हा जलतरण तलाव हवा, अशी मागणी होती. या तलावाला छत्रपती संभाजी महाराज हे नाव देण्याचे नक्की करण्यात आले आहे.

भूमिपूजन कार्यक्रमासाठी भाजप नेते महेश हिरे, स्थानिक माजी नगरसेवक सतीश सोनवणे, डॉ. दीपाली कुलकर्णी, ॲड. श्याम बडोदे, सुप्रिया खोडे, सुनील खोडे, भगवान दोंदे, पुष्पा आव्हाड आदींसह पक्षाच्या पदाधिकाऱ्यांची उपस्थिती राहणार आहे.