मालेगाव : कांदा, मका, बाजरी, कपाशी ही पिके घेतले जाते. तालुक्यात १ लाख ८२ हजार ०३७ हेक्टर भौगोलिक क्षेत्राखाली जमीन आहे. यात १ लाख ४२ हजार ८७९ पिकाखाली क्षेत्र आहे. भाऊसाहेब फुंडकर फळबाग लागवड योजना २०१८-१९ च्या खरीप हंगामापासून सुरु झाली. २०२३ ते सप्टेंबर २०२४ पर्यंत तालुक्यातील ३ हजार ८५० शेतकऱ्यांची फळबाग योजनेत निवड झाली आहे. या योजनेमुळे तालुक्यात दिवसागणिक फळबाग क्षेत्रात वाढ होत आहे. (Fruit garden scheme profitable)

फळबाग योजनेत १६ प्रकारची फळे येतात. यात सीताफळ, मोसंबी, आंबा, आवळा, चिंच, जांभूळ, पेरू, चिकू, नारळ, कोकम, फणस, डाळिंब, लिंबू यासह अनेक फळपिके भाऊसाहेब फुंडकर फळबाग लागवड योजना व रोजगार हमी योजनेंतर्गत येत असतात.

राज्यात विभागानुसार शेतकरी फळ पिकांची निवड करतात. मालेगाव तालुक्यात सर्वात जास्त डाळिंब, लिंबू, मोसंबी, आवळा, चिकू, सीताफळ या फळ पिकांची लागवड होते. पात्र शेतकऱ्यांना पहिल्या वर्षी पन्नास टक्के, दुसऱ्या वर्षी ३०, तिसऱ्या वर्षी २० असे शंभर टक्के अनुदान मिळते.

२०२३- २४ मध्ये सुमारे तीन हजार शेतकऱ्यांपैकी १८०० शेतकऱ्यांनी या फळबाग योजनेचा लाभ घेतला आहे. तसेच २०२४-२५ या हंगामात सुमारे ८५० शेतकऱ्यांची निवड करण्यात आली आहे. शेतकऱ्यांना डाळिंब लागवडीसाठी १ लाख २० तर सिताफळसाठी ८८ हजार, मोसंबी, लिंबूसाठी ७२ हजार, पेरुसाठी ७५ हजार प्रती हेक्टरप्रमाणे अनुदान दिले जाते.

(latest marathi news)

या योजनेमुळे अनेक शेतकरी पारंपारिक शेती करून फळबाग शेतीकडे वळताना दिसत आहेत. मालेगाव तालुक्यात ३२ हजार ७५६ हेक्टरवर बागायत व फळपिके घेतली जात आहेत. डाळिंब १५ हजार हेक्टरवर लागवड झाली आहे. जिल्ह्यात सुमारे ३५ ते ४० हजार हेक्टरवर डाळिंबाचे घेतले जातात. जून ते सप्टेंबर या कालावधीत फळबाग रोपांची लागवड होते. .

"शेतकऱ्यांनी महाडीबीटी पोर्टलवर फळबागेसाठी नोंदणी करावी. नोंदणी करताना सातबारा, खाते उतारा, आधार, बँक पासबुक देणे आवश्‍यक आहे. अर्ज केल्यानंतर शेतकऱ्यांना थेट मोबाईलवर निवड झाल्याचा मेसेज जातो. निवड झाल्यानंतर कागदपत्रांची पुर्तता करून योजनेचा लाभ मिळतो." - भगवान गोर्डे, तालुका कृषी अधिकारी, मालेगाव