Nashik Vote Count : नाशिक, दिंडोरी लोकसभा निवडणुकीसाठीची मतमोजणी मंगळवारी (ता.४) होते आहे. अंबड औद्योगिक वसाहतीतील वेअर हाऊस येथे मतमोजणी होणार असल्याने या परिसरात सार्वजनिक वाहतूकीला प्रवेश बंद केला आहे तर वेअर हाऊसचा स्ट्राँग रुम परिसराभोवती कडेकोट पोलिस बंदोबस्तही तैनात केला जाणार आहे. तसेच सहायक आयुक्तांच्या आदेशानुसार या परिसरात कलम १४४ लागू करण्यात आला. ()

नाशिक, दिंडोरी लोकसभा मतदारसंघांचे इव्हीएम मशिन अंबड वेअर हाऊस येथील स्ट्राँग रुममध्ये ठेवले असून, मंगळवारी (ता. ४) याठिकाणी मतमोजणी होणार आहे. पोलिस आयुक्त संदीप कर्णिक यांच्या आदेशान्वये कडेकोट बंदोबस्ताचे नियोजन करण्यात आलेले आहे. तर वाहतूक उपायुक्त चंद्रकांत खांडवी यांनी वाहतूक मार्गात बदल केल्यासंदर्भातील अधिसूचनाही जारी केली आहे.

तर, उपायुक्त मोनिका राऊत यांच्या मार्गदर्शनाखाली अंबड वेअर हाऊस परिसरात कडेकोट पोलीस बंदोबस्तासह सुरक्षेच्या सज्जतेची पाहणी केली आहे. तर, मतमोजणीच्या दिवशी मंगळवारी याठिकाणी कोणताही अनुचित प्रकार घडू नये, यासाठी अंबड विभागाचे सहायक पोलिस आयुक्त शेखर देशमुख यांनी कलम १४४ लागू केल्याचे आदेश जारी केले आहेत. (latest marathi news)

असे आहेत आदेश

- वेअर हाउस भोवतीचा १०० मीटर परिसरात प्रवेश बंदी

- वाहतूक मार्गात बदल; पर्यायी मार्गांचा वापर करावा

- प्रतिबंधित क्षेत्रात सेल्युलर फोन, मोबाइल, कॉडलेस फोन, आयपॅड, स्मार्ट वॉच नेण्यास बंदी

- ज्वलनशील पदार्थ, अग्निशस्त्रे, घातकशस्त्रे बाळगण्यास मनाई

- निवडणूक निर्णय अधिकार्याकडून प्रमाणित ओळखपत्रधारकांनाच प्रवेश

''मतमोजणीच्या पार्श्वभूमीवर चुंचाळे पोलिस चौकीच्या हद्दीमध्ये कडेकोट पोलिस बंदोबस्ताचे नियोजन केले आहे. मनाई आदेशही जारी करण्यात आले असून त्याचे उल्लंघन केल्यास कायदेशीर कारवाई केली जाईल. त्यामुळे कोणीही उल्लंघन करू नये. पोलिसांना सहकार्य करावे.''- शेखर देशमुख, सहायक पोलिस आयुक्त, अंबड विभाग.